រដ្ឋមន្ត្រីក្រសួងមហាផ្ទៃ បញ្ជាឲ្យស្នងការចាត់វិធានការចំពោះទារថ្លៃសេវាពន្លត់អគ្គិភ័យ
សារព័ត៌មាន Cambodia News/
ភ្នំពេញ (២៧ ឧសភា ២០១៦) ៖ សម្តេច ក្រឡាហោម ស ខេង រដ្ឋមន្ត្រីក្រសួងមហាផ្ទៃ បានបញ្ជាឲ្យស្នងការនគរបាល និងអធិការនគរបាល ចាត់វិធានការ ករណីនគរបាលពន្លត់អគ្គិភ័យ ទាមទារថ្លៃសេវា មុននឹងចុះពន្លត់អគ្គិភ័យ ឆេះលំនៅដ្ឋាន ប្រជាពលរដ្ឋ នៅតាមមូលដ្ឋាននានា ទូទាំងប្រទេស។
សម្តេច ក្រឡាហោម ស ខេង បានថ្លែងបែបនេះ នៅក្នុងពិធីចែករថយន្ត ពន្លត់អគ្គិភ័យ ចំនួន១១៣គ្រឿង ជូនទៅតាមបណ្តាស្នងការនគរបាល ២៤ខេត្ត កាលពីព្រឹកថ្ងៃទី២៦ ខែឧសភា ឆ្នាំ២០១៦នេះ នៅទីស្តីការក្រសួង។
សម្តេច ក្រឡាហោម ស ខេង បានបន្តថា មន្ត្រីពន្លត់អគ្គិភ័យ និងអ្នកពាក់ព័ន្ធ ត្រូវប្រកាន់ទិសស្លោកបួនចំណុច រួមមាន ៖ ១.លឿនឆាប់រហ័ស, ២.ប្រសិទ្ធភាព, ៣.យុត្តិធម៌ ដោយមិន ប្រកាន់ពណ៌សម្បុរ និន្នាការបក្សនយោបាយ ឬតំបន់នេះ ជិតតំបន់នោះឆ្ងាយ និងទី៤.តម្លាភាព គឺត្រូវឈរលើប្រយោជន៍ របស់ប្រជាពលរដ្ឋ ដែលជាអ្នករងគ្រោះពិតប្រាកដ ពោល ជៀសវាងមុនប្រតិបត្តិការ ត្រូវទារលុយកាក់ ពីប្រជាពលរដ្ឋ។
ក្នុងឱកាសនោះដែរ សម្តេចក្រឡាហោម ស ខេង ក៏បានស្នើឲ្យមន្ត្រី ទទួលបន្ទុក ឬអ្នកពាក់ព័ន្ធ ត្រូវហៅរថយន្តសង្គ្រោះរបស់ពេទ្យ ទៅជាមួយដែរ ដើម្បីបង្កា ជួយប្រជាពលរដ្ឋ មានគ្រោះថ្នាក់ និងត្រូវថែរក្សាយានយន្ត ពន្លត់អគ្គិភ័យ ឲ្យបានដិតដល់បំផុត ជៀសវាងខូច នៅពេលមានគ្រោះកើតឡើង៕
