ក្រឡាប់ទូកដឹកជនអន្តោប្រវេសន៍ ចាក់មនុស្សរាប់រយអ្នកចូលក្នុងសមុទ្រ
សារព័ត៌មាន Cambodia News/
អន្តជាតិ (២៧ ឧសភា ២០១៦) ៖ កាលពីថ្មីនេះនៅសមុទ្រមួយឯប្រទេស Libya ទូកនេសាទមួយគ្រឿង ដែលផ្ទុកទៅដោយជនអន្ដោប្រវេសន៍ បានក្រឡាប់លិចចូលទៅសមុទ្រ ធ្វើឲ្យទាហានជើងទឹក កែនគ្នីគ្នាមកជួយយ៉ាងប្រញាប់ប្រញាល់។
ដំបូងឡើយគេឃើញមានទូកនេសាទ ឈើតូចមួយធ្វើដំណើរមក ហើយផ្ទុកជនអន្ដោប្រវេសន៍ប្រហែល៥៥០នាក់នៅលើនោះ ដោយពួកគេមានសញ្ជាតិខុសៗគ្នា។ ដោយផ្ទុកមនុស្សច្រើនលើសកំណត់ ទូកនេសាទក៏រៀងពិបាកធ្វើដំណើរបន្ដិចនោះដែរ។
មួយសន្ទុះក្រោយមកទូកនោះក៏ក្រឡាប់ ចាក់អ្នកជិះទាំងអស់ចូលសមុទ្រ តែម្ដងដោយមានអ្នកខិតខំហែលទឹកស្វែងរកជំនួយ ខ្លះទៀតខិតខំវារតោងទូក ដើម្បីចាំការសង្គ្រោះមកដល់។
ដោយសំណាងល្អ នាវារបស់ទាហានជើងទឹកក៏នៅជិតនោះដែរ ធ្វើឲទាហានទាំងអស់នោះប្រើទូកសង្គ្រោះផង យកអាវពោងឲផង ដើម្បីជួយពូកគេឲ្យរួចផុតពីសេចក្ដីស្លាប់។ មិនតែប៉ុននោះ គេក៏បានប្រើឧទ្ធម្ភាគចក្រដាក់ពង្រាយ ដើម្បីជួយសង្គ្រោះស្រង់មនុស្សពីទឹកផងដែរ។
បើទោះជាខំប្រឹងយ៉ាងណាក៏ដោយ ការសង្គ្រោះគឺមិនបានជួយជីវិតគ្រប់គ្នានោះទេ ព្រោះតែមានជនអន្ដោប្រវេសន៍ចំនួន ៥នាក់បានបាត់បង់ជីវិតក្នុងហេតុការណ៍លិចទូកមួយនេះ៕
