សម្តេច ហ៊ុន សែន រំពឹងថា កម្ពុជានឹងមានភ្ញៀវទេសចរអន្ដរជាតិប្រមាណ៧លាននាក់ នៅឆ្នាំ២០២០
សារព័ត៌មាន Cambodia News/
ភ្នំពេញ (១២ កុម្ភៈ ២០១៦) ៖ សម្តេចនាយករដ្ឋមន្ត្រីហ៊ុន សែនបានសរសេរ លើទំព័រហ្វេសប៊ុក របស់សម្តេច ថា តាមរយៈកំណើនចំនួនទេសចរណ៍សព្វថ្ងៃនេះ គឺយើងអាចរំពឹងបានថានៅឆ្នាំ២០២០ កម្ពុជានឹងទទួលបាន ភ្ញៀវទេសចរអន្ដរជាតិ ប្រមាណ ៧លាននាក់ ព្រមជាមួយនឹងទេសចរណ៍ក្នុងស្រុកប្រមាណពី៨ទៅ១០លាននាក់ នឹងត្រូវធ្វើដំណើរទស្សនានៅទូទាំងប្រទេស។
កំណើន នេះនឹងធ្វើឱ្យចំណូលទេសចរណ៍កើនឡើងដល់ប្រមាណ៥ពាន់លានដុល្លារ ក្នុងមួយឆ្នាំ ដែលនឹងរួមចំណែក យ៉ាងសំខាន់ ដល់កំណើន នៃផលិតផលក្នុងស្រុកសរុប ដែលជួយដល់ការលើកកម្ពស់ កម្រិតជីវភាព រស់នៅរបស់ប្រជាជន និងផ្ដល់ឱកាសការងារប្រមាណ៨០ម៉ឺននាក់ផងដែរ។
ប្រមុខ រដ្ឋាភិបាលបានបន្តថា វិស័យទេសចរណ៌កម្ពុជា កំពុងរីកលូតលាស់ បោះជំហានទៅមុខគួរឱ្យកត់សម្គាល់។ កម្ពុជាមានប្រាសាទអង្គរវត្ត និងប្រាសាទជាច្រើនរយពាន់ទៀត ដែលជាបិតិកភ័ណ្ឌជាតិ និងពិភពលោកដ៏ល្បីល្បាញ។ ទន្ទឹមនឹងនោះកម្ពុជាក៏មានឆ្នេរសមុទ្រដ៏ល្អស្អាត ជាប់ចំណាត់ថ្នាក់ពិភពលោក រួមទាំងតំបន់អេកូទេសចរណ៍ និងទេសចរណ៍ធម្មជាតិ ដ៏សម្បូរបែបជាច្រើនទៀត។
សម្តេចហ៊ុន សែនបានបញ្ជាក់ថា រាជរដ្ឋាភិបាលកម្ពុជា កំពុងអនុវត្តបានជោគជ័យ ក្នុងការជំរុញវិស័យទេសចរណ៍ និងការបង្កើតជើងហោះហើរផ្ទាល់ ពីបរទេសមកកាន់កម្ពុជាជាដើម។ ក្រៅពីនេះយុទ្ធនាការកម្ពុជា ព្រះរាជាណាចក្រអច្ឆរិយៈ ក៏ដូចជាចលនាប្រឡងប្រណាំង ទីក្រុងស្អាត រមនីយដ្ឋានស្អាត សេវាល្អ ក៏បានចូលរួមយ៉ាងសកម្មក្នុងការទាក់ទាញភ្ញៀវទេសចរណ៍បរទេសមក ទស្សនា កម្ពុជាផងដែរ ៕
