លោកស្រីអ៊ុង សានស៊ូជីអំពាវនាវឲ្យគណបក្សរបស់លោកស្រីរៀបចំខ្លួនដើម្បីកាន់អំណាច
នៅ ប្រទេសភូមា គណបក្សសម្ព័ន្ធជាតិដើម្បីលទ្ធិប្រជាធិបតេយ្យរបស់លោក ស្រីអ៊ុង សានស៊ូជីបានបិទបញ្ចប់សមាជបក្សរយៈពេល ៣ថ្ងៃរបស់ខ្លួនក្នុងថ្ងៃអាទិត្យ ទី១០ មីនានេះ។ លោកស្រីអ៊ុង សានស៊ូជីត្រូវបានសមាជបោះឆ្នោតឲ្យបន្តកាន់តំណែងប្រធានគណបក្សជា បន្តទៀត។ ថ្លែងនៅពេលបិទបញ្ចប់សមាជបក្សជាប្រវត្តិសាស្រ្តលោកស្រីអ៊ុង សានស៊ូជីបានអំពាវនាវឲ្យគណ បក្សរបស់លោកស្រីរៀបចំខ្លួន ដើម្បីចូលរួម បោះឆ្នោតសភានៅក្នុងឆ្នំា ២០១៥ ខាងមុខ។ ក៏ប៉ុន្តែ សមាជមិនបានឆ្លើយតបទៅនឹងការទាមទារឲ្យដាក់បញ្ចូលក្មេងៗ ជំនាន់ក្រោយទៅក្នុងរចនាសម្ព័ន្ធដឹកនាំបក្ស ដើម្បីបន្ត វេនពីមេដឹកនាំដែលមានវ័យចំណាស់ៗនោះទេ។
នៅទីបំផុត និងដោយគ្មានបេក្ខជនឈរឈ្មោះណាផ្សេង ក្រៅពីលោក ស្រីអ៊ុង សានស៊ូជី សមាជិកទំាង ១២០រូបនៃគណៈកម្មាធិការកណ្តាលរបស់បក្សក៏បានព្រមព្រៀងគ្នាជា ឯកច្ឆ័ន្ទឲ្យលោកស្រីអ៊ុង សានស៊ូជីបន្តកាន់តំណែងប្រធានគណបក្សសម្ព័ន្ធជាតិដើម្បីលទ្ធិ ប្រជាធិបតេយ្យជាបន្តទៀត។ ការបន្តតំណែងជាប្រធានបក្សរបស់លោកស្រីអ៊ុង សានស៊ូជីបានធ្វើឡើង ចំពេលដែលនៅផ្ទៃក្នុងបក្សកំពុងមានជម្លោះយ៉ាងតានតឹងក្នុងរយៈពេល ប៉ុន្មានខែចុងក្រោយនេះ។ ជម្លោះដែលឈានដល់ការបណ្តេញសមាជិក ៤នាក់ចេញពីគណបក្ស ព្រមទំាងមិនអនុញ្ញាតឲ្យពួកគេចូលរួមនៅក្នុងសមាជបក្សជា ប្រវត្តិសាស្រ្តទៀតផង។ នៅថ្ងៃសៅរ៍ ទី៩ មីនាម្សិលមិញ លោកស្រីអ៊ុង សានស៊ូជីបានថ្លែងទទួលស្គាល់ពីការមានវិវាទនៅផ្ទែក្នុងបក្ស និងបានអំពាវ នាវឲ្យមានការរួបរួមគ្នាជាធ្លុងមួយ។ លោកស្រីអ៊ុង សានស៊ូជីបានស្នើឲ្យសមា ជិកទំាងអស់ទុករឿងផ្ទាល់ខ្លួនមួយកន្លែង និងចូលរួមគិតផលប្រយោជន៍ប្រទេសជាធំ។
គួរជម្រាបជូនថា គណបក្សសម្ព័ន្ធជាតិដើម្បីលទ្ធិប្រជាធិបតេយ្យត្រូវបានគេមើលឃើញថា អាចនឹងទទួលបានជោគជ័យនៅក្នុងការបោះឆ្នោតសភានៅឆ្នំា ២០១៥ ខាងមុខ។ នៅក្នុងបរិបទនេះ គណបក្សរបស់លោកស្រីអ៊ុង សានស៊ូជីត្រូវតែដាក់ចេញនូវយុទ្ធសាស្រ្តមួយ និងចាប់ផ្តើមគិតគូរស្វែងរកដំណោះស្រាយដល់បញ្ហាអាទិភាពមួយចំនួន របស់ប្រទេស រួមមានវិស័យសុខាភិបាល វិស័យអប់រំ ឬមួយក៏បញ្ហាអំពើពុករលួយជាដើម ។ ក៏ប៉ុន្តែ ក្រុមអ្នកវិភាគនយោបាយភូមាបានកត់ សម្គាល់ឃើញជារួមថា នៅក្នុងកាលៈទេសៈបច្ចុប្បន្ន គណបក្សរបស់លោក ស្រីអ៊ុង សានស៊ូជីនៅមិនទាន់មានលទ្ធភាព និងសមត្ថភាពគ្រប់គ្រាន់ក្នុងការដឹក នាំប្រទេសនៅឡើយទេ។មូលហេតុ មកពីមន្រ្តីដឹកនាំបក្សសំខាន់ៗដែលមានសមត្ថ ភាពសព្វថ្ងៃ ភាគច្រើនសុទ្ធតែមានវ័យចំណាស់ ៨០ឆ្នាំ ឬ៩០ឆ្នាំ និងដែលកន្លែងរបស់ពួកគេត្រូវដាក់ជំនួសដោយក្មេងៗជំនាន់ក្រោយវិញ។
យ៉ាងណាក៏ដោយ នៅពេលបិទបញ្ចប់សមាជរយៈពេល ៣ថ្ងៃក្នុងថ្ងៃអាទិត្យនេះ លោកស្រីអ៊ុង សានស៊ូជីបានថ្លែងអំណរគុណចំពោះសមាជិកចាស់ ថ្មីទំាងអស់ដែលបានទ្រំារស់ តស៊ូប្រយុទ្ធជាមួយគណបក្សសម្ព័ន្ធជាតិដើម្បីលទ្ធិប្រជាធិបតេយ្យក្នុង រយៈពេល ២៥ឆ្នំាកន្លងទៅ។ ទន្ទឹមគ្នានេះ លោកស្រីក៏បានទទួលស្គាល់ផងដែរថា ដើម្បីអាចឲ្យគណបក្សមានជីវិតយូរង្វែង និងមានថាមពលខ្លំាងក្លានោះ ការធ្វើកំណែទម្រង់នៅក្នុងរចនាសម្ព័ន្ធដឹកនាំបក្ស តាមរយៈការដាក់បញ្ចូលក្មេងៗជំនាន់ក្រោយ ដើម្បីបន្តវេនពីមេដឹក នាំមានវ័យចំណាស់ គឺជារឿងមួយមិនអាចខ្វះបាន៕ដោយ គួច គន្ធារ៉ា(RFI)
