ដោយសារការចាប់រំលោភ ចំនួនភ្ញៀវទេសចរបរទេសនៅឥណ្ឌាធ្លាក់ចុះ
នៅឥណ្ឌាយោងតាមការសិក្សារបស់សមាគម មួយខាងមន្ទីរពាណិជ្ជកម្មនិងឧស្សាហកម្ម” ក្នុងអំឡុង៣ខែចុងក្រោយនេះ ចំនួនភ្ញៀវទេសចរបរទេសបានធ្លាក់ចុះរហូតដល់៣៥% ។ ការធា្លក់ចុះនៃភ្ញៀវទេសចរនេះ គឺក្រោយពីមានអំពើហិង្សាចាប់រំលោភភេទមួយចំនួននៅក្នុងប្រទេស ដែលត្រូវបានកាសែតជាតិនិងអន្តរជាតិ ចុះផ្សាយជាហូរហែរជាមួយចំណងជើងយ៉ាងធំៗ។
យោងតាមការសិក្សារបស់សមាគមឥណ្ឌាមួយផ្នែកមន្ទីរពាណិជ្ជកម្មនិង ឧស្សាហកម្មដែលបានធ្វើការសាកសួរក្រុមហ៊ុនទេសចរប្រមាណជា១២០០ នៅតាមទីក្រុងផ្សេងៗ បានឲ្យដឹងថាចំនួនភ្ញៀវទេសចរទាំងស្រ្តីនិងបុរស ដែលបានចូលមកទស្សនានៅឥណ្ឌា បានធ្លាក់ចុះយ៉ាងខ្លាំងក្លាក្នុងអំឡុងត្រីមាសចុងក្រោយនេះ។ ភ្ញៀវទេសចរ បានងាកចេញពីប្រទេសឥណ្ឌាដើម្បីទៅលេងនៅប្រទេសអាស៊ីផ្សេងវិញ ដូចជាប្រទេសម៉ាឡេស៊ីឬក៏ប្រទេសថៃជាដើម។
ស្ថានភាពស្ត្រីនៅឥណ្ឌានិងការរំលោភភេទយ៉ាងព្រៃផ្សៃទៅលើស្ត្រី ឥណ្ឌា ត្រូវបានកាសែតជាតិនិងអន្តរជាតិ នាំគ្នាចុះផ្សាយយ៉ាងគគ្រឹកគគ្រេង បន្ទាប់ពី ការចាប់រំលោភភេទរួមគ្នារហូតដល់ស្លាប់លើយុវនារីនិស្សិតពេទ្យ មា្នក់នៅទីក្រុងញូវដេលីកាលពីខែធ្នូ២០១២។
ចំណែកសំណុំរឿងចាប់រំលោភភេទផ្សេងៗទៀតក៏ត្រូវបានកាសែតចុះផ្សាយយ៉ាងលាន់រន្ទឺយ៉ាងខ្លាំងដែរ។
កាលពីខែមីនាមុននេះ ស្រ្តីទេសចរស្វីសម្នាក់ ត្រូវបានក្រុមបុរសជាច្រើននាក់នៅរដ្ឋMadhya Pradesh ភាគកណ្តាលប្រទេសឥណ្ឌា ចាប់រំលោភភេទនៅកន្លែងបោះជំរំជនរងគ្រោះ។ នៅខែមករាមុន នារីកូរ៉េម្នាក់ ត្រូវបានម្ចាស់សណ្ឋាគារដែលនាងស្នាក់នៅក្នុងរដ្ឋដដែល ដាក់ថ្នាំសណ្តំឲ្យដេកលក់ដើម្បីរំលោភ។
ឧប្បត្តិហេតុនៃការរំលោភភេទនេះ បានជំរុញឲ្យមតិសាធារណៈមានការព្រួយ បារម្ភយ៉ាងខ្លាំង ចំពោះសន្តិសុខរបស់ស្រ្តីអ្នកដំណើរដែលចូលមកលេងនៅឥណ្ឌា-នេះបើយោង តាមការយល់ឃើញរបស់អគ្គលេខាធិការនៃសមាគមឥណ្ឌាដដែល។
ក្នុងចំណោម ភ្ញៀវទេសចរដែលគេសាកសួរជិត៧២% បានប្រាប់ថា ពួកគេបានលុបចោលដំណើរកំសាន្តនៅឥណ្ឌាក្នុងអំឡុង៣ខែចុងក្រោយ នេះ ដែលតាមធម្មតាគឺជារយៈពេលដែលមានភ្ញៀវទេសចរច្រើននៅក្នុងប្រទេសជា ពិសេស ស្រ្តីមកពីកាណាដា សហរដ្ឋអាមេរិកនិងអូស្រ្តាលី។
ក្រៅពីភាពយឺតយ៉ាវផ្នែកសេដ្ឋកិច្ចពិភពលោក បញ្ហាសន្តិសុខ ក៏ជាកត្តាដ៏ចម្បងក្នុងការកាត់បន្ថយចំនួនភ្ញៀវទេសចរនេះ។ កត្តាមួយទៀតគឺបណ្តាលមកពីប្រទេសជាច្រើន បានទូន្មានដល់ពលរដ្ឋខ្លួនកុំឲ្យធ្វើដំណើរទៅលេងប្រទេសឥណ្ឌា ទៀត៕ដោយ នុយ ប៊ែរណាដែត (RFI)
