រថយន្តចាក់បេតុងបុកកិននារី២នាក់ស្លាប់ភ្លាមៗនៅនឹងកន្លែងកើតហេតុ
សារព័ត៌មាន Cambodia News/
ភ្នំពេញ (១៣ មិថុនា ២០១៦) ៖ កាលពីវេលាម៉ោង១២ថ្ងៃត្រង់ ថ្ងៃទី១២ ខែមិថុនា ឆ្នាំ២០១៦ រថយន្តចាក់ប៉េតុងធុនធំមួយគ្រឿងបើកបុកម៉ូតូមួយគ្រឿងពីក្រោយ រួចកិនស្លាប់នារី ២នាក់បានស្លាប់ភ្លាមៗនៅនឹងកន្លែងកើតហេតុ នៅចំណុចច្រមុះជ្រូកក្បាលថ្នល់ ស្ថិតក្នុងសង្កាត់ផ្សារដើមថ្កូវ ខណ្ឌចំការមន ។
យោងតាមប្រភពព័ត៌មានបានអោយដឹងថា នៅមុនពេលកើតហេតុ នារីរងគ្រោះទាំង២នាក់ជិះម៉ូតូមួយគ្រឿង ម៉ាកវ៉េវអាល់ហ្វា ពណ៌ខ្មៅ គ្មានស្លាកលេខ ឌុបគ្នាធ្វើដំណើរចេញពីស្ពានច្បារអំពៅបំណងឆ្ពោះទៅកាន់ផ្លូវ២៧១ ក្នុងទិសដៅពីកើតទៅលិច ក្នុងល្បឿនធម្មតា ស្រាប់តែមានរថយន្តចាក់ប៉េតុងធុនធំមួយ គ្រឿង ពណ៌ក្រហមលាយស ពាក់ស្លាកលេខ ភ្នំពេញ 5A-0030 បើកបរដោយបុរសម្នាក់ស្របទិសគ្នា បានបើកមកកៀរម៉ូតូនារីរងគ្រោះពីក្រោយពេញទំហឹង រួចកិននារីរងគ្រោះទាំង២នាក់ស្លាប់ភ្លាមៗតែម្តង ។
បន្ទាប់ កើតហេតុ ភ្លាមៗនោះ រថយន្តបង្កបានព្យាយាមបើករត់គេចខ្លួន តែត្រូវបានសមត្ថកិច្ចដែលប្រចាំការនៅចំណុចខាងលើដេញតាមឃាត់បានមក វិញ ទាំងរថយន្ត និងអ្នកបើកបរ ។
សពនារីរងគ្រោះទាំង២នាក់មាន វ័យប្រមាណជាង២០ឆ្នាំដូចគ្នា ហើយពួកគេទាំង២នាក់មិនទាន់ត្រូវបានស្គាល់អត្តសញ្ញាណនៅឡើយទេ ដោយសមត្ថកិច្ចកំពុងស្រាវជ្រាវទំនាក់ទំនងរកសាច់ញាតិ ដើម្បីអោយមកទទួលយកទៅធ្វើបុណ្យទៅតាមប្រពៃណី ។
ក្រោយកើតហេតុ សមត្ថកិច្ចមូលដ្ឋានបានចុះអន្តរាគមន៍សហការជាមួយសមត្ថកិច្ចជំនាញចុះ វាស់វែង អូសយកទាំងរថយន្តបង្ក និងម៉ូតូរបស់នារីរងគ្រោះទៅរក្សាទុកនៅការិយាល័យចរាចរណ៍ជើងគោក រាជធានីភ្នំពេញ រង់ចាំដោះស្រាយទៅតាមផ្លូវច្បាប់នៅពេលក្រោយ ។ ក្នុងនោះ អ្នកបើកបររថយន្តបង្កក៏ត្រូវបានឃាត់ខ្លួនយកទៅជាមួយផងដែរ ៕
