សមត្ថកិច្ចចុះព័ទ្ធចាប់ចោរប្លន់មួយគ្រួសារឃាត់ខ្លួនបាន ម្តាយ និងកូន ប្តីរត់គេចខ្លួនបាត់
សារព័ត៌មាន Cambodia News/
ភ្នំពេញ (២៣ មិថុនា ២០១៦) ៖ កាលពីល្ងាចថ្ងៃទី២២ ម្សិលមិញ ក្រុមសមត្ថកិច្ចចុះឡោមព័ទ្ធចាប់គ្រួសារមួយមានសមាជិក៣នាក់ ឪពុកម្តាយ និងកូនប្រុសម្នាក់ ដល់ផ្ទះស្ថិតនៅតាមផ្លូវលំភូមិក្រាំងអង្រង សង្កាត់ក្រាំងធ្នង់ ខណ្ឌសែនសុខ ពីបទ ចោរកម្មលួចប្លន់ឡាន និងម៉ូតូជាច្រើនលើកច្រើនសារមកហើយ ដោយសមត្ថកិច្ចបានចាប់ឃាត់ខ្លួនម្តាយ និងកូនប្រុសនៅក្នុងផ្ទះ តែបុរសជាប្តីបានរត់គេចខ្លួនមុនសមត្ថកិច្ចចូលទៅដល់។
ប្រភពពី សមត្ថកិច្ចបានបញ្ជាក់ថា មុនឈានទៅដល់ការឡោមព័ទ្ធ និងចាប់ខ្លួនក្រុមប្លន់ទាំងនេះ គឺដោយសារតែពួកគេបានលួចម៉ូតូមួយគ្រឿង នៅតាមផ្លូវម៉ង់ឫទ្ធី ប៉ុន្តែស៊យម៉ូតូរបស់ជនរងគ្រោះ ចាប់ប្រព័ន្ធ GPS ទើបកម្លាំងនគរបាល តាមទៅបង្ក្រាបជាក់ស្តែងតែម្តង។
ក្រោយចូលឆែកឆេរនៅក្នុង ផ្ទះ ក្រោមការសម្របសម្រួលពីតំណាងអយ្យការនោះ កម្លាំងនគរបាលបានរកឃើញ និងដកហូតរថយន្តមួយគ្រឿង និងម៉ូតូ៣គ្រឿងផងដែរ៕
