នៅឆ្នាំ២០១៥ ពលរដ្ឋខ្មែរម្នាក់ រំពឹងថា នឹងទទួលបានចំណូល ១.២២៥ ដុល្លារ
សារព័ត៌មាន Cambodia News/
ភ្នំពេញ (២៨ វិច្ចិកា ២០១៤) ៖ សម្រាប់ប្រជាពលរដ្ឋខ្មែរម្នាក់ ត្រូវបានរដ្ឋាភិបាល រំពឹងថា នឹងទទួលបានចំណូល ១.២២៥ ដុល្លារ ក្នុងមួយឆ្នាំ នៅឆ្នាំ២០១៥។ ចំណែកកំណើនសេដ្ឋកិច្ច នៅឆ្នាំ២០១៥ នឹងសម្រេចបានរង្វង់ ៧%។
តួលេខខាងលើនេះ ត្រូវបានសម្តេចនាយករដ្ឋមន្ត្រី ហ៊ុនសែន លើកឡើង ក្នុងសេចក្តីថ្លែងហេតុ នៃសេចក្តីព្រាងច្បាប់ ស្តីពី ហិរញ្ញវត្ថុសម្រាប់ការគ្រប់គ្រងឆ្នាំ២០១៥។ សេចក្តីព្រាងច្បាប់ហិរញ្ញវត្ថុ ឆ្នាំ២០១៥ ដែលរដ្ឋសភា បានពិភាក្សា និងអនុម័ត នាព្រឹកថ្ងៃទី២៨វិច្ឆិកា។
សេចក្តីថ្លែងហេតុ បង្ហាញថា នៅឆ្នាំ២០១៤ តាមការប៉ាន់ស្មានបឋម កំណើនសេដ្ឋកិច្ចកម្ពុជា សម្រេចបានរង្វង់ ៧%។ កំណើនសេដ្ឋកិច្ចនេះ បានមកពីវិស័យ ៣ សំខាន់ គឺទី១-វិស័យឧស្សាហកម្ម មានកំណើន ៩,៦% ទី២-វិស័យសេវា មានកំណើន ៧,៥% និងទី៣-វិស័យកសិកម្ម អាចសម្រេចបានកំណើន ២,៦%។
សេចក្តីថ្លែងហេតុដដែល លើកឡើងថា សម្រាប់ឆ្នាំ២០១៥ ការព្យាករណ៍កំណើនសេដ្ឋកិច្ច រំពឹងថា កម្ពុជានឹងសម្រេចបានក្នុងរង្វង់ ៧% ដែលធ្វើឲ្យផលិតផលក្នុងស្រុកសរុប ផផស ឬGDP តាមថ្លៃបច្ចុប្បន្ន មានចំនួន ៧៤.៤៤៤ ពាន់លានរៀល ស្មើប្រមាណជា ១៨.៣៨១ លានដុល្លារអាមេរិក។ ប្រការនេះ ធ្វើឲ្យ ផសស សម្រាប់មនុស្សម្នាក់ រំពឹងថា នឹងទទួលបាន ១.២២៥ ដុល្លារអាមេរិក។
សេចក្តីថ្លែងហេតុ ក៏បានបង្ហាញថា នៅឆ្នាំ២០១៤ ពលរដ្ឋកម្ពុជាម្នាក់ ទទួលបានចំណូល ១.១៣០ ដុល្លារ។ ចំណែកនៅឆ្នាំ២០១៣ មានចំនួន ១.០៤៣ ដុល្លារ៕
