អាមេរិកនឹងដាក់បំរាមធ្វើដំណើរទៅកូរ៉េខាងជើងចូលជាធរមាននៅថ្ងៃទី១ខែកញ្ញា
សារព័ត៌មាន Cambodia News/
អាមេរិក (០៣ សីហា ២០១៧) ៖ ក្រសួងការបរទេសអាមេរិកបាននិយាយកាលពីថ្ងៃពុធថា បំរាមធ្វើដំណើរសម្រាប់អ្នកកាន់លិខិតឆ្លងដែនសហរដ្ឋអាមេរិកទៅកាន់ប្រទេសកូរ៉េខាងជើងនឹងចូលជាធរមាននៅថ្ងៃទី១ខែកញ្ញាហើយពលរដ្ឋអាមេរិកនៅក្នុងប្រទេសនេះគួរតែចាកចេញមុនកាលបរិច្ឆេទនោះ។
ក្រសួងបាននិយាយនៅក្នុងសេចក្តីជូនដំណឹងជាសាធារណៈមួយថា អ្នកសារព័ត៌មាននិងបុគ្គលិកមនុស្សធម៌អាចដាក់ពាក្យសុំលើកលែងចំពោះបំរាមនេះ។ កាលពីខែមុន រដ្ឋាភិបាលសហរដ្ឋអាមេរិកបាននិយាយថា ខ្លួននឹងរារាំងជនជាតិអាមេរិកធ្វើដំណើរទៅប្រទេសកូរ៉េខាងជើងដោយសារតែហានិភ័យនៃការឃុំខ្លួនរយៈពេលវែងនៅទីនោះ។
ការហាមឃាត់នេះបានធ្វើឡើងចំពេលមានភាពតានតឹងកាន់តែខ្លាំងរវាងសហរដ្ឋអាមេរិកនិងកូរ៉េខាងជើងដែលកំពុងធ្វើការដើម្បីអភិវឌ្ឍមីស៊ីលបំពាក់ក្បាលគ្រាប់នុយក្លេអ៊ែរមានសមត្ថភាពអាចវាយប្រហារសហរដ្ឋអាមេរិក៕
