ខាងប្រុសដើរផ្លូវខុស ព្រោះចង់ឆាប់បានលុយរៀបការ
សារព័ត៌មាន Cambodia News/
ភ្នំពេញ (១៥ សីហា ២០១៦) ៖ គូស្នេហ៍មួយគូបានយំអោបគ្នា ពេលដែលសមត្ថកិច្ចចាប់ខ្លួនយុវជនជាគូស្នេហ៍ បន្ទាប់ពីជននោះធ្វើសកម្មភាពគាស់ផ្ទះគេ កាលពីវេលាម៉ោង០៩ និង៣០នាទីព្រឹកថ្ងៃទី១៥ សីហា ២០១៦ ស្ថិតនៅក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។
ប្រភពឱ្យ ដឹងថា ជនសង្ស័យត្រូវចាប់ខ្លួននោះឈ្មោះឃឹម សំណាង អាយុ២៣ឆ្នាំ មានស្រុកកំណើតនៅក្នុងភូមិក្រញូង ឃុំមុខដា ស្រុករមាសហែក ខេត្តស្វារៀង ។
ចំណែកនារីជាគូស្នេហ៍ ឈ្មោះរ៉េន សៅ អាយុ១៩ឆ្នាំ ជាកម្មការិនី មានស្រុកកំណើតនៅក្នុងភូមិខ្នា ឃុំលាយបូរ ស្រុកត្រាំកក់ ខេត្តកែវ មិនត្រូវបាននគរបាលឃាត់ខ្លួនទេ ។
ប្រភពបន្តថា ខាងស្រីបានឱ្យខាងប្រុសខំប្រឹងរកលុយ ដើម្បីសន្សំទុករៀបការឱ្យបានពេញច្បាប់ ប៉ុន្តែនាងក៏មិនបានឱ្យប្ដីទៅរកស៊ីអ្វី ដែលជាសកម្មភាពល្មើសច្បាប់នោះដែរ។
ក្រោយមកដោយសារតែចង់ ឆាប់បានលុយទៅរៀបការពេក ជននោះបានដើរផ្លូវខុស បែកគំនិតធ្វើជាចោរគាស់ផ្ទះ ដើម្បីលួចទ្រព្យសម្បត្តិតាមផ្ទះប្រជាពលរដ្ឋនិងតាមបន្ទប់ផ្ទះជួល ដែលកម្មករស្នាក់នៅតែក៏ត្រូវបានកម្លាំងនគរបាលឃាត់ខ្លួនបាន ។
បន្ទាប់ពីត្រូវចាប់ខ្លួន នាងជាប្រពន្ធបានទៅមើលប្ដីដល់ប៉ុស្ដិ៍នគរបាល និងបានឱបគ្នាយំយ៉ាងកំសត់ ហើយនាងបានសួរទៅប្ដីមិនទាន់រៀបការនោះថា «អូនឱ្យបងខំរកលុយដើម្បីរៀបការ ហេតុអីបានជាបងទៅធ្វើជាចោរបែបនេះ?» ខណៈនោះជនខាងលើ គ្មានអ្វីនិយាយច្រើន ក្រៅតែពីការយំឱបនាងជាប្រពន្ធវិញតែប៉ុណ្ណោះ៕
