កូរ៉េខាងជើងគំរាមវាយប្រហារដោយអាវុធនុយក្លេអ៊ែរលើសហរដ្ឋអាមេរិក និងកូរ៉េខាងត្បូង
សារព័ត៌មាន Cambodia News/
កូរ៉េខាងជើង (២៣ សីហា ២០១៦) ៖ កាលថ្ងៃចន្ទម្សិលមិញកូរ៉េខាងជើងបានថ្កោលទោស ការធ្វើសមយុទ្ធយោធារួមគ្នារវាងសហរដ្ឋអាមេរិក និងកូរ៉េខាងត្បូង ហើយរដ្ឋឯកកោមួយនេះថែមទាំងបានគំរាមវាយប្រហារ ដោយអាវុធនុយក្លេអ៊ែរស្វ័យការពារទៀតផង។
សហរដ្ឋអាមេរិក និងកូរ៉េខាងត្បូងបានចាប់ផ្តើមសមយុទ្ធ យោធាប្រចាំឆ្នាំរបស់ខ្លួនកាលពីថ្ងៃចន្ទម្សិលមិញ ជាហេតុនាំឲ្យមានការព្រមានសងសឹកពីកូរ៉េខាងជើង ខណៈដែលមានភាពតានតឹងកើនឡើងបន្ថែមទៀត ក្រោយមន្ត្រីទូតជាន់ខ្ពស់មួយរូបរបស់ទីក្រុងព្យុងយ៉ាង បានរត់មកជ្រកកោននៅប្រទេសកូរ៉េខាងត្បូង។
ទោះបីជាយ៉ាងណាក៏ដោយអ្នកនាំពាក្យកងទ័ពប្រជាជនកូរ៉េ បានអះអាងនៅក្នុងសេចក្តីថ្លែងការណ៍មួយ ដែលបានចាក់ផ្សាយនៅលើកញ្ចក់ទូរទស្សន៍រដ្ឋ KRT ថា ចាប់ពីពេលនេះតទៅកងទ័ពកូរ៉េខាងជើងបានត្រៀមខ្លួនរួចរាល់ ក្នុងការវាយបកមកលើគូសត្រូវដែលពាក់ព័ន្ធនឹងសមយុទ្ធយោធា Ulchi Freedom Guardian ៕
