ក្រុមការងារបច្ចេកទេសចុះពិនិត្យទីតាំងជើងកបគ្រោះថ្នាក់ចរាចរណ៍នៅផ្លូវជាតិលេខ៤
ខេត្តព្រះសីហនុ៖ មន្រ្តីជាន់ខ្ពស់ក្រុមហ៊ុនអេហ្សិតនាពេលថ្មីៗនេះបានដឹកនាំក្រុមវិស្វករនិងអ្នកបច្ចេកទៅពិនិត្យមើលទីតាំងមួយចំនួននៅតាមដងផ្លូវជាតិ៤ ដែលអ្នកដំណើរអះអាងថា ជាចំនុចជើងកបនៃគ្រោះថ្នាក់ចរាចរណ៍កន្លងមក។
លោក ឧកញ៉ា លឹម រស់ អគ្គនាយកក្រុមហ៊ុនអេហ្សិតបានមានប្រសាសន៍ថា ការចុះពិនិត្យមើលទីតាំងទាំងនោះគឺពិតជាមានសារសំខាន់ណាស់ ដើម្បីឲ្យក្រុមវិស្វករ អ្នកបច្ចេក និងអ្នកជំនាញការងារចរាចរណ៍បានដឹងពីមូលហេតុពិតប្រាកដដែលនាំឲ្យកើតមានគ្រោះថ្នាក់ចរាចរណ៍ ហើយពួកគេអាចរិះរកវិធីសាស្រ្តទាំងផ្នែកបច្ចេកទេសនិងផ្លូវច្បាប់គឺធ្វើយ៉ាងណាជួយបង្កើនសុវត្ថិភាពចរាចរណ៍នៅពេលធ្វើដំណើរតាមដងផ្លូវ។
គួរបញ្ជាក់ថា ចំណុចជើងកបគឺជាទីតាំងដែលមន្រ្តីជំនាញកំណត់ថា មានគ្រោះថ្នាក់ចរាចរណ៍ដែលមានមនុស្សស្លាប់ ឬក៏របួសច្រើននាក់ លើសពី៣ដងក្នុងមួយឆ្នាំនៅចន្លោះផ្លូវប្រមាណប្រវែង៣០០ម៉ែត្រ។
បន្ទាប់ពីការចុះត្រួតពិនិត្យមក លទ្ធផលបង្ហាញថា គ្រោះថ្នាក់នៅចំណុចជើងកបគឺបណ្តាលមកពីការបើកបរធ្វេសប្រហែស និងបើកក្នុងល្បឿនលឿនពេក។
លោកឧកញ៉ា លឹម រស់ បញ្ជាក់ថា ដើម្បីបញ្ជៀសឲ្យបានគ្រោះថ្នាក់ចរាចរណ៍ជាអតិបរមារ នោះអ្នកប្រាស់ផ្លូវថ្នល់ និងអ្នកធ្វើអាជីវកម្មលើវិស័យដឹកជញ្ជូនទាំអស់ត្រូវតែផ្លាស់ប្តូរឥរិយាបថក្នុងការបើកបរ ដោយគោរពច្បាប់ចរាចរណ៍ តាមរយៈការពង្រឹងគុណភាពលើការងារគ្រប់គ្រងទាំងផ្នែកបច្ចេកទេសយានយន្ត និងធ្វើការអប់រំដល់អ្នកបើកបរឲ្យក្លាយជាអ្នកបើកបរអាជីពប្រកបដោយវិជ្ជាជីវៈ ខណៈដែលតម្រូវឲ្យមានយន្តការត្រួតពិនិត្យជាប្រចាំ និងពង្រឹងការអនុវត្តច្បាប់ឲ្យបានម៉ឺងម៉ាត់។
លោកឧកញ៉ាបានបន្តថា ដំណើរចុះពិនិត្យផ្លូវនេះក៏មានគោលបំណងផ្តោតលើការងារជួសជុល និងថែទាំផ្លូវដែរដែលជាអទិភាព ដូចជាការពង្រីកផ្លូវពីរង្វង់មូលចោមចៅដល់ទីរួមខេត្តកំពង់ស្ពឺ ការពង្រីកផ្លូវនៅតាមកំណាត់ផ្លូវកោងនិងផ្លូវចុះចំណោត ការអ៊ុតបិទគ្រលុក ស្នាមប្រេះតួផ្លូវ គំនូសចរាចរណ៍ ការបំពាក់ស្លាកចរាចរណ៍ថ្មី និងជួសជុលស្លាកចរាចរណ៍ចាស់ៗ។ល។និង។ល។
នៅក្នុងដំណើរនេះ លោកឧកញ៉ានិងក្រុមការងាររបស់លោកបានជួបជាមួយម្ចាស់លំនៅដ្ឋានមួយចំនួនដែលនៅជាប់តាមបណ្តោយផ្លូវជាតិលេខ៤ ពិសេសម្ចាស់ផ្ទះដែលស្ថិតនៅចំណុចដែលត្រូវពង្រីកផ្លូវ។
នៅក្នុងជំនួបនោះ លោកឧកញ៉ាបានប្រាប់ម្ចាស់លំនៅដ្ឋានថា ក្រុមហ៊ុនអេហ្សិតត្រូវធ្វើការពង្រីកផ្លូវ និងកាយប្រឡាយថ្មីរំដោះទឹកនៅតាមមុខផ្ទះរបស់ពួកគាត់ ដើម្បីជាប្រយោជន៍សម្រាប់ពួកគាត់និងសាធារណជនទូទៅ ហើយថា ការកាយប្រឡាយនេះ ក្រុមហ៊ុនជាអ្នកជួយ តែម្ចាស់ផ្ទះត្រូវចេញថ្លៃបំពង់លូនិងកប់លូដោយរៀបឥដ្ឋចាក់សាបឲ្យបានស្អាតល្អតាមលក្ខណៈបច្ចេកទេស។
លោកឧកញ៉ាក៏បានអំពាវនាវឲ្យម្ចាស់លំនៅដ្ឋាននៅតាមបណ្តោយផ្លូវជាតិលេខ៤ ក៏ដូចជាអ្នកប្រើប្រាស់ដងផ្លូវជាតិនេះដែរឲ្យជួយថែទាំផ្លូវទាំងអស់គ្នា ហើយបើកបរឲ្យប្រុងប្រយ័ត្នដើម្បីសុវត្ថិភាពចរាចរណ៍របស់អ្នកដំណើរទាំងអស់។
លោក បូ ម្ចាស់លំនៅដ្ឋានមួយនៅតាមបណ្តោយផ្លូវជាតិលេខ៤នៅចំណុចផ្សារព្រៃផ្តៅបាននិយាយថា ក្នុងនាមលោកជាអ្នកតំណាងពលរដ្ឋដែលរស់នៅទីនោះ លោកបានឯកភាពចំពោះការការអភិវឌ្ឍផ្លូវនេះ ដើម្បីបានផ្លូវទូលាយផង មានសោភ័ណ្ឌភាពផង និងមានសុវត្ថិភាពផង។
លោកបានបញ្ជាក់ថា ប្រជាពលរដ្ឋដែលរស់នៅក្នុងតំបន់ផ្សារព្រៃផ្តៅបានឯកភាពរំកិលរបងផ្ទះចូលក្នុង ដើម្បីបើកផ្លូវឲ្យក្រុមហ៊ុនបានពង្រីកផ្លូវកាន់តែធំ។
គួររំលឹកថា ក្រុមហ៊ុនអេហ្សិតបានទទួលសិទ្ធិពីរាជរដ្ឋាភិបាលកម្ពុជាដើម្បីថែទាំ និងជួសជុលផ្លូវជាលេខ៤ ហើយកន្លងមកនេះ ក្រុមហ៊ុនបានពង្រីកផ្លូវ៤ជួរចាប់ពីតំបន់ភូមិសាស្រ្តរាជធានីភ្នំពេញឆ្ពោះទៅកាន់ទីរួមខេត្តកំពង់ស្ពឺ និងពង្រីកផ្លូវនៅតាមទីប្រជុំជនមានដូចជាទីរួមខេត្តកំពង់ស្ពឺ ពេជ្រនិល ទីប្រជុំជនវាលរេញ ទីប្រជុំជនស្មាច់ដែងដល់ឃ្លាំងលើ និងពង្រីកកំណាត់ផ្លូវខ្លីៗផ្សេងទៀតដូចជា ភូមិសាស្រ្តដែលមានចរាចរមមាញឹកកំណាត់ ផ្លូវ កោង និងកំណាត់ផ្លូវដែលអាចបង្កគ្រោះថ្នាក់ចរាចរណ៍៕ (អត្ថបទសហការី)
