នាងក្អយ ជាប់ពន្ធនាគារ ៣ឆ្នាំ ៦ខែ ក្នុងរឿងជួលរថយន្តជិះរួចស៊ីដាច់
ភ្នំពេញបច្ចុប្បន្ន/
ភ្នំពេញ៖ កាលពីរសៀលថ្ងៃទី១២ ខែកក្កដា ឆ្នាំ២០១៣ បន្ទាប់ពីបើកសវនាការជំនុំជម្រះរួចហើយកាលពីថ្ងៃទី១០ ខែមិថុនា ឆ្នាំ២០១៣ កន្លងទៅ ចៅក្រមសាលាដំបូងរាជធានីភ្នំពេញ បានប្រកាសសាលក្រមសម្រេចផ្តន្ទាទោសនាងជួន ចាន់រតនា ហៅ ក្អយ ដាក់ពន្ឋនាគាររយៈពេល ៣ឆ្នាំ ៦ខែ លើសំណុំរឿងចំនួន២ ពាក់ព័ន្ឋ ករណី ជួលរថយន្តគេជិះរួចយកទៅបញ្ចាំ ។
ដោយឡែកក្នុងសំណុំរឿងទាំងពីរខាងលើនេះ ចៅក្រមស៊ើបសួរបានចេញដីកាបង្គាប់ឱ្យចាប់ខ្លួនរួចហើយ ដោយពុំចាំបាច់ឱ្យចៅក្រមជំនុំជម្រះចេញដីកាបង្គាប់ឱ្យចាប់ខ្លួនទេ ។ ប៉ុន្តែរហូតមកទល់ពេលនេះសមត្ថកិច្ចពុំទាន់ចាប់ខ្លួននាងក្អយបាន នៅឡើយ ។
គួររំឭកថា ក្នុងសំណុំរឿងទី១ ដើមបណ្តឹងបានចោទប្រកាន់ថា កាលពីថ្ងៃទី១៩ ខែធ្នូ ឆ្នាំ២០១០ នាងក្អយបានជួលរថយន្តម៉ាកឡិចស៊ីស RX 300 មួយគ្រឿងជិះក្នុងកិច្ចសន្យារយៈពេល៤ខែ។ ប៉ុន្តែនៅថ្ងៃទី១៩ ខែ មេសា ឆ្នាំ២០១១ នាងក្អយ បានយករថយន្តនេះទៅបញ្ចាំក្នុងតម្លៃ៨០០០ដុល្លារអាមេរិក។ ក្រោយមកសមត្ថកិច្ចបានឃាត់ខ្លួនអ្នកទទួលបញ្ចាំ និងដកហូតរថយន្តនេះបាន ទើបបែកធ្លាយដល់ដើមបណ្តឹងថា នាងក្អយ បានយករថយន្តនេះទៅបញ្ចាំ ។
ក្រោយពីចាត់ការសំណុំរឿងនេះរួចហើយ តុលាការបានសម្រេចចោទប្រកាន់នាងក្អយ ពីបទ រំលោភលើទំនុកចិត្ត រួចចេញដីកាចាប់ខ្លួននាងក្អយ យកមកសាកសួរតាមច្បាប់។ប៉ុន្តែរហូតមកទល់ពេលនេះសមត្ថកិច្ចពុំទាន់ ចាប់ខ្លួននាងក្អយបានបាននៅឡើយទេ ទើបតុលាការសម្រេចបិទការស៊ើបសួរ រួចបញ្ជូនសំណុំរឿងនេះទៅបើកសវនាការជំនុំជម្រះតែម្តង។
ដោយឡែកក្នុងសំណុំរឿងទី២ ដើមបណ្តឹងបានចោទប្រកាន់ថា កាលពីថ្ងៃទី១៧ ខែតុលា ឆ្នាំ២០១០ នាងក្អយ និងបុរសម្នាក់ទៀតឈ្មោះ លីវ រ៉ាម៉ូ បានជួលរថយន្តម៉ាកហាយឡេនឌ័រ មួយគ្រឿងយកមកជិះ ដោយចេញមូលប្បទានប័ត្រលេខ ៩៣៣៧៥០ គណនីលេខ ១០០៩២៦៣ មានទឹកប្រាក់ ១៥៤៥០ដុល្លារអាមេរិក ទុកតម្កល់ឱ្យម្ចាស់រថយន្ត។
ក្រោយមកនៅថ្ងៃទី២ ខែមីនា ឆ្នាំ២០១១ នាងក្អយ និងឈ្មោះលីវ រ៉ាម៉ូ មកយករថយន្តនោះទៅលក់ឱ្យអ្នកដទៃក្នុងតម្លៃ១៥០០០ដុល្លារ រួចគេចវេះមិនទទួលខុសត្រូវ ទើបម្ចាស់រថយន្តដាក់ពាក្យបណ្តឹងតែម្កង។
ក្រោយពីចាត់ការសំណុំរឿងនេះរួចហើយ តុលាការបានសម្រេចចោទប្រកាន់នាងក្អយ និងឈ្មោះ លីវ រ៉ាម៉ូ ពីបទឆបោក និង ចេញមូលប្បទានប័ត្រគ្មានទឹកប្រាក់ រួចចេញដីកាចាប់ខ្លួននាងក្អយ យកមកសាកសួរតាមច្បាប់។ប៉ុន្តែរហូតមកទល់ពេលនេះសមត្ថកិច្ចពុំអាច ចាប់ខ្លួននាងក្អយ បានទេ ទើបតុលាការសម្រេចបិទការស៊ើបសួរ រួចបញ្ជូនសំណុំរឿងនេះទៅបើកសវនាការជំនុំជម្រះតែម្តង៕