ស្ពានជ្រោយចង្វាចាស់ នឹងបិទជាបណ្តោះអាសន្ន ចាប់ពីថ្ងៃទី១តុលា ដើម្បីធ្វើការជួសជុល
សារព័ត៌មាន Cambodia News/
ភ្នំពេញ (២៧ កញ្ញា ២០១៧) ៖ ក្នុងសេចក្តីជូនដំណឹង ចុះថ្ងៃទី២៦ ខែកញ្ញា ឆ្នាំ២០១៧ ទីភ្នាក់ងារជប៉ុនចៃកា បានប្រកាសថា ស្ពានមិត្តភាពកម្ពុជា-ជប៉ុន ( ស្ពានជ្រោយចង្វាចាស់ ) នឹងត្រូវបិទជាបណ្តោះអាសន្ន ចាប់ពីថ្ងៃទី១ ខែតុលា ឆ្នាំ២០១៧ ខាងមុខនេះ ដើម្បីធ្វើការជួសជុលស្តារឡើងវិញ។ ចរាចរណ៍ទ្វេទិសឆ្លងកាត់ទន្លេ នឹងប្រព្រឹត្តទៅតែនៅលើស្ពានមិត្តភាពកម្ពុជា-ចិន តែមួយប៉ុណ្ណោះ។
សេចក្តីជូនដំណឹង បន្តថា ការស្តារឡើងវិញស្ពានជ្រោយចង្វាចាស់នេះ គឺជាការឆ្លើយតបទៅនឹងសំណើសុំបន្ទាន់របស់រាជរដ្ឋាភិបាលកម្ពុជា ទៅកាន់រដ្ឋាភិបាលជប៉ុន ដោយហេតុថា ស្ពាននេះ មានសភាពទ្រុឌទ្រោមខ្លាំង ដែលមិនមានសុវត្ថិភាពសម្រាប់ការដឹកជញ្ជូនសាធារណៈឆ្លងកាត់ទន្លេ។ គម្រោងជួសជុលស្តារឡើងវិញនេះ ត្រូវបានគាំទ្រដោយហិរញ្ញប្បទានឥតសំណងរបស់រដ្ឋាភិបាលជប៉ុន ក្នុងទឹកប្រាក់ចំនួន ៣.៣៤៣ លានយ៉េន ប្រមាណជា ៣៣ លានដុល្លារអាមេរិក។ ការជួសជុលស្តារឡើងវិញនៃស្ពាននេះ នឹងប្រើរយៈពេលប្រមាណជា ២១ ខែ រហូតដល់ខែមិថុនា ឆ្នាំ២០១៩។
សេចក្តីជូនដំណឹង ក៏បានបន្តថា គម្រោងជួសជុលស្ពានជ្រោយចង្វានេះ ចរាចរណ៍ អាចនឹងមានការកកស្ទះខ្លាំងនៅបរិវេណជុំវិញការដ្ឋានសាងសង់ ជាពិសេសនៅត្រង់ចំណុចរង្វង់មូលស្ពានទាំងសងខាង ( រង្វង់មូលកួចកាណុង និងរង្វង់មូលព្រហ្មមុខបួន )។ ដូច្នេះហើយក្រសួងសាធារណការ និងដឹកជញ្ជូន និងរដ្ឋបាលរាជធានីភ្នំពេញ សូមការអធ្យាស្រ័យ និងយោគយល់ពីសំណាក់ប្រជាពលរដ្ឋ ចំពោះការរំខានទាំងឡាយណា ដែលនឹងកើតមានឡើងក្នុងកំឡុងពេលនៃការជួសជុលស្ពាននេះ ។
ទីភ្នាក់ងារជប៉ុនចៃកាបានគូសបញ្ជាក់ថា ការស្តារឡើងវិញស្ពានជ្រោយចង្វាចាស់នេះ គឺជាការឆ្លើយតបទៅនឹងសំណើសុំបន្ទាន់របស់រាជរដ្ឋាភិបាលកម្ពុជា ទៅកាន់រដ្ឋាភិបាលជប៉ុន ដោយហេតុថា ស្ពាននេះ មានសភាពទ្រុឌទ្រោមខ្លាំង ដែលមិនមានសុវត្ថិភាពសម្រាប់ការដឹកជញ្ជូនសាធារណៈឆ្លងកាត់ទន្លេ៕
