គណបក្សប្រជាជន អបអរសាទរ ថ្ងៃជ័យជំនះ ៧មករា ខួបលើកទី៣៤
ភ្នំពេញ៖ នៅព្រឹកថ្ងៃទី៧ មករា ២០១៣នេះ គណបក្ស ប្រជាជនកម្ពុជា បានរៀបចំពិធី អបអរ សាទរ ទិវាជ័យជំនះ ៧មករា ឆ្នាំ១៩៧៩-៧ មករា ២០១៣ ដែលជាខួបលើកទី៣៤ ប្រារព្ធធ្វើ ឡើង នៅទី ស្នាក់ការ កណ្តាល គណបក្សប្រជាជន (គ៨៥) ។
ពិធីអបអរសាទរ ទិវាជ័យជំនះ ៧មករា ឆ្នាំ១៩៧៩-៧ មករា ២០១៣នេះប្រព្រឹតិ្តទៅក្រោម អធីបតីភាព របស់សម្តេច ជា ស៊ីម ប្រធានគណបក្ស សម្តេច ហេង សំរិន ប្រធានកិត្តិយស គណបក្ស ប្រជាជន និងសម្តេច ហ៊ុន សែន អុនប្រធាន គណបក្ស ប្រជាជន ព្រមទាំងមន្រ្តី គ្រាប់ជាន់ខ្ពស់ និងសមាជិកសមាជិកា គណបក្សប្រជាជន ជាច្រើនរូបផ្សេងទៀតផងដែរ។
នៅក្នុងមីទ្ទិញរំឭកខួប លើកទី៣៤ នៃទិវាជ័យជំនះ ថ្ងៃ៧មករា ប្រមុខដឹកនាំគណបក្សប្រជាជនកម្ពុជាបានប្រកាសថា សិទ្ធិមនុស្ស និងលទ្ធិប្រជាធិបតេយ្យ នៅកម្ពុជា កើតចេញពីថ្ងៃ៧មករា ដែលថ្នាក់ដឹកនាំគណបក្សប្រជាជនកម្ពុជា ក្រោមការទំនុកបម្រុងពីកងទ័ពស្ម័គ្រចិត្តវៀតណាម បានវាយផ្តួលរំលំរបបប្រល័យពូជសាសន៍ ប៉ុល ពត។
ប្រធានរដ្ឋសភា ប្រធានកិត្តិយសនៃគណបក្សប្រជាជនកម្ពុជា សម្តេច ហេង សំរិន បានបន្ថែមថា “គណបក្សប្រជាជនកម្ពុជា បន្តជំរុញរាល់សកម្មភាពដើម្បីការពារ លើកកម្ពស់លទ្ធិប្រជាធិបតេយ្យ និងការគោរពសិទ្ធិមនុស្សនៅក្នុងបរិការណ៍ នៃកម្ពុជាឱ្យបានកាន់តែប្រសើរឡើងជានិច្ច”។
សម្តេច ហេង សំរិន បានលើកឡើងថា “ ប្រជាធិបតេយ្យ និងសិទ្ធិមនុស្សនៅកម្ពុជាបានចាប់ផ្តើមជាមួយនឹងការរស់ឡើងវិញរបស់ ប្រជាជន បន្ទាប់ពីបានផ្តួលរំលំរបបប្រល័យពូជសាសន៍ ហើយត្រូវបានការពារ ពង្រឹង និងពង្រីកឥតឈប់ឈរ ក្នុងដំណើរការកសាង និងការពារមាតុភូមិរយៈពេល ៣៤ឆ្នាំ។
សម្តេច ហេង សំរិន បានបញ្ជាក់ថា “ជ័យជំនះ៧មករា បាននាំមកនូវសិទ្ធិជាសារវន្តបំផុតរបស់មនុស្សមកជូនប្រជាជន គឺសិទ្ធិមានជីវិតរស់នៅ ហើយផ្តើមចេញពីសិទ្ធិជាសារវន្តនេះហើយ ដែលមានសិទ្ធិទទួលបានចំណីអាហារ ទទួលបានការអប់រំ ទទួលបានការព្យាបាល សិទ្ធិបញ្ចោញមតិ សិទ្ធិបង្កើតគណបក្ស បង្កើតអង្គការ និងសមាគមនានា៕
