សុំស្រឡាញ់មិនបាន លើកគ្នាជាង ២០នាក់ព្រួតវាយ
សារព័ត៌មាន Cambodia News/
ភ្នំពេញ (១៥ កញ្ញា ២០១៦) ៖ នារីវ័យក្មេង៤នាក់ត្រូវបានយុវជនមួយក្រុមមានគ្នាប្រមាណជាង២០នាក់ព្រួតវាយបង្កឲ្យមានការភ្ញាក់ផ្អើលកាលពីវេលាម៉ោង១ និង២០នាទីរំលងអាធ្រាត្រឈានចូលថ្ងៃទី១៥ ខែកញ្ញា ឆ្នាំ២០១៦ នៅចំណុចមុខណាហ្គាវើល តាមបណ្តោយផ្លូវព្រះសុរាម្រិត ស្ថិតក្នុងសង្កាត់ចតុមុខ ខណ្ឌដូនពេញ រហូតទាល់តែសមត្ថកិច្ចបាញ់គំរាម២គ្រាប់ទើបនាំគ្នារត់ចែកជើងគ្នា ។
តាមសំដីនារីរងគ្រោះបានឲ្យដឹងថា មុនពេលកើតហេតុរូបគេមានគ្នា៤នាក់ជិះម៉ូតូ១គ្រឿងឌុបគ្នាមកពីអង្គុយញ៉ាំអាហារនៅសួនច្បារនៅគល់ស្ពានកោះពេជ្រ ពេលញ៉ាំរួចក៏នាំគ្នាជិះម៉ូតូត្រឡប់ទៅផ្ទះវិញ ។
ខណៈជិះមកដល់មុខណាហ្គាវើល ស្រាប់តែមានជនសង្ស័យមួយក្រុមមានគ្នាជាង២០នាក់ជិះម៉ូតូជាច្រើនគ្រឿងបានមកក្បែរ ហើយបានធ្វើសកម្មភាពធាក់ម៉ូតូ និងកៀរផ្តួល រួចព្រួតគ្នាវាយតែម្តង។
ស្របពេលកម្លាំងសមត្ថកិច្ចល្បាតឃើញទាន់ក៏បានដកកាំភ្លើងបាញ់ចំនួន២គ្រាប់ឡើងលើធ្វើឲ្យក្រុមជនសង្ស័យភ័យនាំគ្នាជិះម៉ូតូរត់តាំងពីចំណុចកើតហេតុរហូតដល់ចំណុចមុខវត្តកោះតាមបណ្តោយផ្លូវព្រះមុនីវង្ស ទើបកម្លាំងនគរបាលដេញចាប់បាន២នាក់ និងម៉ូតូ១គ្រឿងយកទៅសួរនាំ ។
ក្រោយពេលកើតហេតុ ជនសង្ស័យទាំង២នាក់រួមទាំងម៉ូតូ ត្រូវបានសមត្ថកិច្ចយកទៅប៉ុស្តិ៍រដ្ឋបាលនគរបាលចតុមុខដើម្បីធ្វើការសាកសួរ ទើបដឹងថា ករណីខាងលើភាគីទាំងសងខាងសុទ្ធតែស្គាល់គ្នា ហើយមូលហេតុដែលបណ្តាលឲ្យមានការវាយតប់គ្នានោះកើតមកពីការតាមសុំស្រឡាញ់មិនបានពីសំណាក់ក្រុមជនបង្ក ទើបខឹងតាមវាយតែម្តង ៕
