ឯកបអគ្គរដ្ឋទូតរុស្ស៊ីប្រចាំក្រុងអង់ការ៉ាត្រូវបានប៉ូលិសតួកគីម្នាក់បាញ់សម្លាប់
សារព័ត៌មាន Cambodia News/
តួកគី (២០ ធ្នូ ២០១៦) ៖ ឯកអគ្គរដ្ឋទូតរុស្ស៊ីប្រចាំប្រទេសតួកគីត្រូវបាញ់សម្លាប់កាលពីថ្ងៃទី១៩ ធ្នូ នៅទីក្រុងអង់ការ៉ា ដោយប៉ូលិសតួកគីម្នាក់ ដែលអះអាងថា ជាការសងសឹកចំពោះសោកនាដកម្មនៅទីក្រុងអាឡែប ស៊ីរី ដែលកំពុងធ្លាក់ក្នុងកណ្តាប់ដៃរបបស៊ីរីទាំងស្រុងក្រោមការជួយទ្រទ្រង់របស់ក្រុងមូស្គូ ។
ឯកអគ្គរដ្ឋទូតរុស្ស៊ីរូបនេះ លោកអានដ្រេកា ឡូវ ត្រូវបាញ់សម្លាប់ជាច្រើនគ្រាប់ពេលលោកកំពុងថ្លែងសុន្ទរកថាមួយនាឱកាសបើកពិព័រណ៍សិល្បៈមួយនៅរដ្ឋធានីតួកគី ។
តាមវីដេអូអំពីឆាកវាយប្រហារផ្សាយតាមបណ្តាញសង្គម គេឃើញឃាតករស្រែកគ្រហឹមដំបូងជាភាសាអារ៉ាប់ បន្ទាប់មកជាភាសាតួកគី ខណៈឯកអគ្គរដ្ឋទូតរូបនេះដេកដួលលើដីក្បែររូបគេ ។ បុរសរូបនេះស្លៀកពាក់ខ្មៅ ហើយកាន់កាំភ្លើងខ្លីមួយដើម បានស្រែកពាក្យថា ព្រះអាល់ឡាហ៍ជាធំ ហើយស្រែកជាភាសាអារ៉ាប់ថា បណ្តាអ្នកគាំទ្រជីហាដ ចូរកុំភ្លេចស៊ីរី ចូរកុំភ្លេចអាឡែប ។ បន្ទាប់មកទៀត គេស្រែកជាភាសាតួកគី២ដងថា ពួកអ្នកចួលរួមក្នុងអំពើបិសាចនឹងត្រូវទទួលបាបកម្មម្តងមួយៗ ។
ឃាតករដែលត្រូវគេបាញ់សម្លាប់ត្រូវបានអាជ្ញាធរតួួកគីប្រាប់ថា មានឈ្មោះ MEVLUT MERT ALTINTAS ជាប៉ូលិសវ័យក្មេងអាយុ២២ឆ្នាំ ។ គេពុំទាន់ច្បាស់ក្នុងពេលភ្លាមៗថាតើប៉ូលិសរូបនេះជាអ្នកចូលរួមក្នុងកិច្ចការពារការបើកពិព័រណ៍នេះដែរឬយ៉ាងណាឡើយ ៕
