លោកហ៊ុន សែន បន្ទោសការឡើងថ្លៃស្បៀងដោយសារប្រេងឡើងថ្លៃ
កាលពីថ្ងៃទី២១ ឧសភា ២០១២ ម្សិលមិញលោកនាយករដ្ឋមន្ត្រី ហ៊ុន សែន បានដាក់ការបន្ទោសចំពោះការឡើងថ្លៃស្បៀងអាហារ និងតម្លៃប្រេងឥន្ធនៈ ដែលកំណត់ដោយសមាគមអ្នកផលិតប្រេងដូចជា OPEC ជាដើម ដោយបានធ្វើការអំពាវនាវឲ្យបណ្តាប្រទេសផលិតប្រេងទាំងអស់ យកចិត្តទុកដាក់ ទៅលើទំនាក់ទំនងរវាងសន្តិសុខស្បៀង និងថាមពល។
លោកហ៊ុន សែន បានសម្តែងការបារម្ភ ជុំវិញព័ត៌មានកាលពីពេលថ្មីៗនេះ ដែលបង្ហាញថា អ្នកផលិតស្បៀង ៨០ ភាគរយ នៅកម្ពុជា នឹងដំឡើងតម្លៃស្បៀងរបស់ពួកគេ ដើម្បីតាមតម្លៃប្រេង ដែលកំពុងកើនឡើងខ្ពស់ថា ប្រទេសកម្ពុជា បានធ្វើការនាំចូលប្រេងឥន្ធនៈ ១០០ ភាគរយ ហើយផលិតកម្មកសិកម្មភាគច្រើន ពឹងផ្អែកទៅលើប្រេងឥន្ធនៈ។
យោងតាមឯកសារការពិត ដែលចេញផ្សាយក្នុងពេលសិក្ខាសាលាស្តីពីសន្តិសុខស្បៀង និងអាហារូបត្ថម្ភនោះបានឲ្យដឹងថា ប្រទេសកម្ពុជា ស្ថិតក្នុងចំណោមបណ្តាប្រទេស ២០ លើសកលលោក ដែលជាប់ចំណាត់ថ្នាក់មិនល្អខាងផ្នែកកង្វះអាហារូបត្ថម្ភកុមារ។ ឯកសារនោះបន្តថា កង្វះអាហារូបត្ថម្ភកុមារ ជាបញ្ហាសុខភាពធំបំផុតមួយដែលប្រទេសកម្ពុជាបច្ចុប្បន្ន កំពុងប្រឈមមុខ៕
