ក្រសួងពាណិជ្ជកម្មចុះ MOU ជាមួយសាកលវិទ្យាល័យ AUPP ក្នុងការអនុវត្តគម្រោង Microsoft នៅកម្ពុជា
សារព័ត៌មាន Cambodia News/
ដោយ ៖ ហេង នាង/
ភ្នំពេញ (២៧ កញ្ញា ២០១៦) ៖ កាលពីថ្ងៃទី២៦ ខែកញ្ញា ឆ្នាំ២០១៦ ក្រសួងពាណិជ្ជកម្ម និងសាកលវិទ្យាល័យអាមេរិកកាំងភ្នំពេញ (AUPP) បានចុះហត្ថលេខា ចាប់ដៃគ្នាដើម្បីអនុវត្តគម្រោង Microsoft នៅកម្ពុជាលើផែ្នកព័ត៌មាន បទពិសោធន៍
និងចំណេះដឹងទាក់ទងនឹងពាណិជ្ជកម្មក្នុងវិស័យអប់រំនិងការ អនុវត្តគម្រោងបកប្រែមកជាភាសាខែ្មរ (Translator Hub-Khmer) នៅសាកលវិទ្យាល័យអាមេរិកកាំងភ្នំពេញ។
អនុរដ្ឋលេខាធិការក្រសួងពាណិជ្ជកម្ម លោក សុខ សុភ័ក្ត្រ បានថ្លែងថា “កិច្ចសហការនេះនឹងដើរតួនាទីយ៉ាងសំខាន់ និងផ្តល់អត្ថប្រយោជន៍យ៉ាងច្រើនទៅដល់អ្នកប្រើប្រាស់ក្នុងសង្គម។ AUPP ជាសាកលវិទ្យាល័យតែមួយ គត់ដែលក្រសួងពាណិជ្ជកម្មបានសម្លឹងឃើញ ដែលផ្តល់នូវធនធានមនុស្សប្រកបដោយគុណភាព។
ជាមួយគ្នានោះដែរ លោកសាស្ត្រាចារ្យបណ្ឌិត Nial Farrell សាកលវិទ្យាធិការស្តីទីទទួលបន្ទុកកិច្ចការសិក្សារបស់ AUPP បាននិយាយថា “សាកលវិទ្យាល័យអាមេរិកាំងភ្នំពេញពិតជាមានក្តីសោមនស្សរីករាយខ្លាំងណាស់ ដែលទទួលបានឱកាសដ៏ថ្លៃថ្លាជាដៃគូរសហប្រតិបត្តិការលើគម្រោងបកប្រែ Translation Hub-Khmer ក៏ដូចជាគម្រោងផ្សេងៗទៀតជាមួយក្រសួងពាណិជ្ជកម្ម។
ដើម្បីអនុវត្តគម្រោងនេះនិស្សិតនៅ AUPP បានត្រៀមខ្លួនជាស្រេច ហើយពួកគេបានបណ្តុះគំនិតក្នុងការចែករំលែកចំណេះដឹង ដើម្បីអភិវឌ្ឍប្រទេសកម្ពុជាក្នុងពេលបច្ចុប្បន្នក៏ដូចជាពេលអនាគត”។
យោងតាមខ្លឹមសារនៃឯកសារចុះហត្ថលេខាបានឲ្យដឹងថាក្រសួងពាណិជ្ជកម្មនិងក្រុមហ៊ុនម៉ៃក្រូសូហ្វ (Microsoft) បានចុះកិច្ចព្រមព្រៀងជាមួយគ្នាចំនួនពីរ កាលពីខែកក្កដានិងខែសីហា ឆ្នាំ២០១៦ ដើម្បីអនុវត្តកិច្ចសហប្រតិបត្តិការក្នុងវិស័យព័ត៌មានវិទ្យារួម មានការជំរុញនិងពង្រឹងការប្រើប្រាស់កម្មវិធីកុំព្យូទ័រនិងកម្មវិធីការពារសុវត្ថិភាពដែលមិនលួចចម្លង (Genuine Software) ។
ការបណ្ដុះបណ្ដាលនិងចែករំលែកចំណេះដឹងទាក់ទងបទល្មើសតាមប្រព័ន្ធអ៊ីនធឺណិត (Cyber-crime and cyber-security) និងការផ្ដល់ព័ត៌មានអំពីបច្ចេកវិទ្យាថ្មីៗ៕
