ក្រុងសេអ៊ូលដកបុគ្គលិកចុងក្រោយរបស់ខ្លួនពីតំបន់ឧស្សាហកម្ម Kaesong
នៅ ថ្ងៃចន្ទនេះ ជនជាតិកូរ៉េខាងត្បូងទាំងអស់ដែលបំរើការនៅតំបន់ឧស្សាហកម្ម Kaesong ដែលមានទីតាំងនៅប្រទេសកូរ៉េខាងជើងនោះ ត្រូវចាកចេញពីតំបន់នេះ ដើម្បីត្រលប់ទៅកាន់ប្រទេសកំណើតរបស់ខ្លួនវិញ។ ការចាកចេញនេះ អាចនឹងធ្វើអោយតំបន់ឧស្សាហកម្ម Kaesong ដែលជាប្រភពចំណូលសេដ្ឋកិច្ចសំរាប់ក្រុងព្យុងយ៉ាងត្រូវបិទ ចោលជាស្ថាពរ។
កូរ៉េខាងត្បូងបានសំរេចដកបុគ្គលិកជនជាតិខ្លួនទាំងអស់ ដែលបំរើការនៅតំបន់ឧស្សាហកម្ម Kaesong ក្នុងប្រទេសកូរ៉េខាងជើងនោះ អោយចាកចេញពីទីនោះ។ ការសំរេចនេះធ្វើឡើង គឺដោយ សារតែរដ្ឋាភិបាលក្រុងព្យុងយ៉ាងមិនព្រមចរចាជាមួយខ្លួន អំពីអនាគតនៃតំបន់ឧស្សាហ កម្ម Kaesong។ តំបន់នេះត្រូវបានព្យួរលែងដំណើរការ តាំងតែពីដើមខែមេសាមក បន្ទាប់ពីក្រុងព្យុងយ៉ាង បានទទួលទណ្ឌកម្មថ្មីទៀតពីអង្គការសហប្រជាជាតិ។គួររំលឹកថា កាលពីថ្ងៃព្រហស្បតិ៍កន្លង ទៅ កូរ៉េខាងត្បូងបានដាក់កំហិត២៤ម៉ោងដល់កូរ៉េខាងជើង អោយចរចាលើតំបន់ Kaesong ជាមួយខ្លួន។
កាលពីថ្ងៃសៅរ៍ បុគ្គលិកបំរើការងារអោយសហគ្រាសកូរ៉េខាងត្បូងនានា នៅតំបន់ឧស្សាហកម្ម Kaesong ១២៦នាក់ ក្នុងនោះមានជនជាតិចិនម្នាក់ បានចាកចេញពីតំបន់នេះ ធ្វើដំណើរឆ្ពោះទៅកាន់កូរ៉េខាងត្បូង ដោយឆ្លងកាត់តាមកន្លែងត្រួតពិនិត្យ Paju ដែលជាខ្សែបន្ទាត់បែងចែកទឹកដីកូរ៉េទាំងពីរ។ ហើយបុគ្គលិកបំរើការសេសសល់ជាង៥០នាក់ផ្សេងទៀត ត្រូវចាកចេញអស់ពីតំបន់ឧស្សាហកម្ម Kaesong នៅព្រឹកថ្ងៃចន្ទនេះ។
នៅថ្ងៃចន្ទនេះដែរ ក្រុងសេអ៊ូលបានប្រាប់ក្រុងព្យុងយ៉ាងថា នឹងបញ្ជូនមនុស្ស៥០នាក់ ដូចដែលបានគិតទុក អោយមកកាន់តំបន់ Kaesong វិញ ប៉ុន្តែកូរ៉េខាងជើងនៅតែពុំទាន់ផ្តល់ការយល់ព្រមទៅតាមសំណើរបស់ កូរ៉េខាងត្បូង។
ដោយឡែក ក្រុងព្យុងយ៉ាងបានចោទក្រុងសេអ៊ូលសារជាថ្មី នៅថ្ងៃចន្ទនេះថា ជាអ្នកទទួលខុសត្រូវលើវិបត្តិទាំងអស់នេះ ហើយព្រមានថានឹងដាក់វិធានការចាំបាច់ ប្រសិនបើក្រុងសេអ៊ូលនៅបន្តធ្វើអោយស្ថានភាពកាន់តែដុនដាប ខ្លាំង។
គួររំលឹកឡើងវិញថា តំបន់ឧស្សាហកម្ម Kaesong បានបង្កើតក្នុងទស្សវត្សរឆ្នាំ ២០០០ ជាតំបន់សេដ្ឋកិច្ចតំណាងការទូតរវាងកូរ៉េទាំងពីរ។ ក្នុងឆ្នាំ២០១២ កន្លងទៅ សកម្មភាពតំបន់នេះ បានផ្តល់ជាចំណូលទឹកប្រាក់ជាង ៤៦៩ លានដុល្លារ។ ការដកបុគ្គលិកការងារកូរ៉េខាងត្បូងចេញពីតំបន់ឧស្សាហកម្ម Kaesong អាចនឹងធ្វើអោយតំបន់នេះត្រូវបិទទ្វារជាស្ថាពរ។
អ្នកវិភាគនានារំពឹងថា នៅពេលតំបន់នេះលែងមានសកម្មភាពសេដ្ឋកិច្ចទៀតនោះ កូរ៉េខាងជើងនឹងដាក់កងទ័ពខ្លួននៅទីនោះ។ ហើយស្ថានភាពយោធាថ្មីនេះគឺមានលក្ខណៈដូចជាស្ថាន ភាពយោធា នៅមុនពេលដែលតំបន់ឧស្សាហកម្ម Kaesong ត្រូវបានបង្កើតអញ្ចឹងដែរ។ ពោលគឺជាការគំរាមដល់ក្រុងសេអ៊ូល។
ផ្ទុយទៅវិញ ការបិទលែងអោយតំបន់ឧស្សាហកម្ម Kaesong ដំណើរការ គឺធ្វើអោយកូរ៉េខាងជើងខាតបង់។ ព្រោះថា តំបន់ឧស្សាហកម្ម Kaesong ជាប្រភពចំណូលសំរាប់ជាតិខ្លួន។ កូរ៉េខាងជើងជួបការខ្វះខាតធ្ងន់ធ្ងរផ្នែកស្បៀងអាហារ ដោយសារតែគ្រោះធម្មជាតិ និងការគ្រប់គ្រងកសិកម្មមិនបានល្អ។ នាពាក់កណ្តាលទស្សវត្សរឆ្នាំ ៩០ ជនជាតិកូរ៉េខាងជើងពីរលាននាក់បានស្លាប់ដោយសារតែគ្រោះអត់ឃ្លាន។
នៅថ្ងៃចន្ទនេះ ប្រមុខការទូតកូរ៉េខាងត្បូងបានផ្តល់ឧកាសសារជាថ្មីដល់ ក្រុងព្យុងយ៉ាង ដោយប្រាប់ថា ទ្វានៃការចរចាលើអនាគតតំបន់ Kaesong នៅបើកចំហរនៅឡើយ។ ប៉ុន្តែក្រុងព្យុងយ៉ាងត្រូវតែសំរេចចិត្តអោយបានឆាប់រហ័ស ព្រោះថាការពន្យាពេល អាចនឹងធ្វើអោយការបាត់បង់សេដ្ឋកិច្ចពិបាកនឹងកែកុនឡើងវិញ៕ដោយ ព្រំ សឿន សូលីណា (RFI)
