ជនជាតិកូរ៉េខាងត្បូង ៣នាក់ ត្រូវបានប៉ូលិសហ្វីលីពីនបាញ់សម្លាប់ក្នុងយុទ្ធនាការបង្រាបគ្រឿងញៀន
សារព័ត៌មាន Cambodia News/
សេអ៊ូល (១៤ តុលា ២០១៦) ៖ ជនជាតិកូរ៉េខាងត្បូង ០៣នាក់ ក្នុងនោះមានបុរសពីរនាក់ និងស្ត្រីម្នាក់ ដែលអ្នកទាំងនេះ មានអាយុខ្ទង់៤០ឆ្នាំ ត្រូវបានគេបាញ់សម្លាប់កាលពីថ្ងៃអង្គារនៅក្នុងទីក្រុង Bacolod ស្ថិតនៅក្បែររដ្ឋធានីម៉ានីលប្រទេសហ្វីលីពីន។ នេះបើយោងតាមមន្ត្រីមួយរូបនៃក្រសួងការបរទេសកូរ៉េខាងត្បូង។
យោងតាមការចុះផ្សាយរបស់សារព័ត៌មាន Channel News Asia នៅថ្ងៃព្រហស្បតិ៍ ទី១៣ ខែតុលា ឆ្នាំ២០១៦នេះ ដោយដកស្រុងសម្តីមន្ត្រីស្ថានកុងស៊ុលកូរ៉េខាងត្បូង ប្រចាំទីក្រុង ម៉ានីល បានឲ្យដឹងថា ជនរងគ្រោះទាំងអស់ត្រូវបាន គេបាញ់សម្លាប់នៅត្រង់ក្បាល ហើយក្នុងចំណោមពួកគេមានម្នាក់ដៃជាប់ ចំណង។
មន្ត្រីរូបនេះបានបញ្ជាក់ថា រាប់ទាំងជនរងគ្រោះទាំង០៣នាក់ខាងលើ ចំនួនពលរដ្ឋ កូរ៉េខាងត្បូង ដែលត្រូវបានសម្លាប់នៅ ហ្វីលីពីន ក្នុងឆ្នាំ២០១៦នេះ កើនឡើងដល់ ០៦នាក់ បើធៀបទៅនឹងឆ្នាំ២០១៥ ជនជាតិ កូរ៉េខាងត្បូង សរុប១១នាក់ត្រូវបានសម្លាប់ នៅក្នុងប្រទេសនៃតំបន់អាស៊ីអាគ្នេយ៍មួយនេះ៕
