ព្រឹទ្ធសភាថៃពិនិត្យគំរោងច្បាប់លើកលែងទោស ក្រោមសម្ពាធនៃបាតុកម្មក្រុមប្រឆាំង
នៅថ្ងៃចន្ទ១១វិច្ឆិកានេះ នៅប្រទេសថៃ ព្រឹទ្ធសភាថៃបានសិក្សាពិនិត្យគំរោងច្បាប់លើកលែងទោស ដែលសភាបានអនុម័ត កាលពីថ្ងៃ១វិច្ឆិកា។ ការពិនិត្យច្បាប់នេះ បានធ្វើឡើងក្រោមសម្ពាធបាតុកររាប់ពាន់នាក់ ដែលបាននាំគ្នាចុះតាមផ្លូវនៅក្រុងបាងកក បរិហារប្រឆាំងច្បាប់នេះ។ ថៃបានដាក់ពង្រាយកងកម្លាំងដើម្បីការពារ ទប់ស្កាត់សកម្មភាពជាយថាហេតុណាមួយពីសំណាក់បាតុករដែលដឹកនាំដោយបក្ស ប្រជាធិបតេយ្យរបស់អតីតនាយករដ្ឋមន្ត្រី អាប់ភិសិត វេចាជីវ៉ា។
គួររំលឹក ថា គំរោងច្បាប់លើកលែងទោសដែលព្រឹទ្ធសភាថៃបានសិក្សាពិនិត្យនៅថ្ងៃចន្ទ ទី១១វិច្ឆិកានេះ មានទិសដៅលើកលែងទោសសកម្មជននយោបាយនានា ដែលជាប់ពាក់ព័ន្ធនឹងសកម្មភាពផ្សេងៗ រហូតរាលដាលជាអំពើហិង្សាក្នុងប្រទេស។ គឺគិតចាប់ពីពេលរដ្ឋប្រហារទំលាក់អតីតនាយករដ្ឋមន្ត្រីថាក់ស៊ីន ស៊ីណាវ៉ាត្រា កាលពីខែកញ្ញា ឆ្នាំ២០០៦ រហូតដល់ខែឧសភា ឆ្នាំ២០១២។ គំរោងច្បាប់នេះ ត្រូវបានសភាអនុម័តរួចមកហើយ កាលពីថ្ងៃ១វិច្ឆិកា កន្លងទៅ។
នៅថ្ងៃចន្ទម្សិលមិញ ក្រុងបាងកករងស្ថានភាពតានតឹងដោយសារតែបាតុកររាប់ពាន់នាក់នាំគ្នា ចុះតាមដងផ្លូវប្រឆាំងបរិហារច្បាប់នេះ។ សកម្មជនទាំងនោះបានធ្វើបាតុកម្មជាច្រើនថ្ងៃមកហើយ ទៅតាមការអំពាវនាវរបស់គណបក្សប្រជាធិបតេយ្យដឹកនាំដោយអតីត នាយករដ្ឋមន្ត្រីថៃ អាប់ភិសិត វេចាជីវ៉ា។ បាតុករទាំងនោះយល់ថា រដ្ឋាភិបាលថៃដឹកនាំដោយលោកស្រីយីងឡាក់ ស៊ីណាវ៉ាត្រា យកលេសប្រើច្បាប់លើកលែងទោសនេះ ដើម្បីបើកផ្លូវអោយអតីតនាយករដ្ឋមន្ត្រី ថាក់ស៊ីន ស៊ីណាវ៉ាត្រា ដែលបានភៀសខ្លួនទៅប្រទេសអេមីរ៉ា អារ៉ាប់រួមនោះ អាចត្រលប់ចូលមកទឹកដីថៃវិញ។ គួររំលឹកថា លោក ថាក់ស៊ីន ត្រូវបានតុលាការកាត់ទោសកំបាំងមុខ កាលពីឆ្នាំ២០០៨ អោយជាប់ពន្ធនាគារពីរឆ្នាំ ពីបទបំពានអំណាច និងលួចបន្លំពន្ធរដ្ឋ។
មេដឹកនាំបក្សប្រឆាំងជាច្រើនរូប បានដាក់ពេលវេលាកំណត់ដល់រដ្ឋាភិបាលថៃ អោយដកគំរោងច្បាប់នេះជាបន្ទាន់ ដោយមិនចាំបាច់អោយព្រឹទ្ធសភាសំរេចអនុម័តនោះទេ។ ពេលវេលាកំណត់នោះ គឺត្រូវបានចប់នៅម៉ោង១២យប់ ក្នុងថ្ងៃចន្ទនេះហើយ៕ដោយ ព្រំ សឿន សូលីណា (RFI)