គណៈរដ្ឋមន្រ្តីស្នើឱ្យបណ្តាបណ្តាញផ្សព្វផ្សាយជួយផ្សព្វផ្សាយព្រះរាជកម្មវិធីបុណ្យដង្ហែរព្រះបរមសព
ភ្នំពេញ ៖ នៅថ្ងៃអង្គារ៍ទី១៥ ខែមករា ២០១៣នេះ មន្រ្តីជាន់ខ្ពស់រាជរដ្ឋាភិបាលកម្ពុជា បានស្នើឱ្យបណ្តាបណ្តាញ ផ្សព្វផ្សាយក្នុងស្រុកនានា ចូល រួមផ្សព្វផ្សាយឱ្យបានទូលំទួលាយ នូវព្រះរាជកម្មវិធីបុណ្យដង្ហែរនិងបូជាព្រះបរមសព អតីត ព្រះបរមសព អតីតព្រះមហាវីរក្សត្រកម្ពុជា សម្តេច ព្រះនរោត្តម សីហនុ។
ថ្លែងនៅក្នុងសន្និសីទសារព័ត៌មាន នៅទីស្តីការគណៈរដ្ឋមន្រ្តី លោក ស្វាយ ស៊ីថា រដ្ឋលេខាធិការទីស្តីការគណៈរដ្ឋមន្រ្តី បានស្នើឱ្យបណ្តាទូរទស្សន៍ និងវិទ្យុក្នុងស្រុកនានា ព្រមទាំងសារព័ត៌មាន នានា ជួយផ្សព្វផ្សាយព្រះរាជកម្មវិធីបុណ្យ ដែលពិធីដង្ហែរព្រះបរមសព នឹងត្រូវធ្វើឡើងនៅថ្ងៃទី១ ខែកុម្ភៈ និងពិធីថ្វាយព្រះភ្លើង នៅថ្ងៃទី៤ខែកុម្ភៈ។
ដោយគ្រប់ក្រសួងស្ថាប័ន គ្រឹះស្ថានសាធារណៈ និងឯកជនព្រមទាំង ប្រជាពលរដ្ឋនៅទូទាំងប្រទេស ត្រូវបង្ហូតទង់ជាតិ ត្រឹមមួយភាគបីនៃដង និងត្រូវតុបតែងសញ្ញា កាន់មរណៈទុក្ខលើព្រះឆាយាលក្ខណ៍ ហើយប្រជាពលរដ្ឋ គ្រប់រូប ត្រូវពាក់សញ្ញា កាន់មរណៈទុក្ខក្នុងរយៈពេលកាន់ មរណទុក្ខនេះ។មន្រ្តីរាជការទាំងអស់ត្រូវឈប់សម្រាកពីការងារនៅថ្ងៃទី១ខែកុម្ភៈ ដែលជាថ្ងៃព្រះរាជពិធី ដង្ហែព្រះបរមសព និងនៅថ្ងៃទី៤ កុម្ភៈ ជាថ្ងៃថ្វាយព្រះភ្លើងព្រះបរមសព។
គ្រប់ស្ថានីយវិទ្យុ ទូរទស្សន៍ជាតិ និងឯកជន ព្រមទាំងកន្លែងកំសាន្តសប្បាយ ត្រូវផ្អាកការផ្សាយ ដែល មានលក្ខណៈសប្បាយគគ្រឹកគគ្រេង ក្នុង រយៈពេល៧ថ្ងៃ។គ្រប់គ្រឹះស្ថានសាធារណៈ និងឯកជន អគារពាណិជ្ជកម្ម និងអាជីវកម្មគ្រប់ប្រភេទ ស្ថិតនៅតាមដងវិថី និងមហាវិថី ដែលត្រូវ ដង្ហែក្បួន ព្រះបរមសព ត្រូវផ្អាកសកម្មភាពការងារ និងអាជីវកម្មរបស់ខ្លួន នៅថ្ងៃទី១ ខែកុម្ភៈ។
គ្រប់វត្តអារាម បូជនីយដ្ឋាននានា និងអាស្រម វិបស្សនា ត្រូវរៀបចំពិធីគោរព ព្រះវិញ្ញាណក្ខន្ធឲ្យ បានវិសេសវិសាល សក្តិសម និងសេចក្តីគោរពស្រលាញ់ ដោយរៀបចំ និមន្តព្រះសង្ឈ សូត្រមន្ត បង្សុកូល និងទូងស្គរ វាយគង-ឃ្មោះ នៅពេលចាប់ផ្តើមព្រះរាជពិធី ដង្ហែព្រះបរមសព ចេញពីព្រះបរមរាជវាំង ពេលព្រះបរមសពយាងដល់ ទីលានវាលព្រះមេរុ និងពេលថ្វាយព្រះភ្លើងព្រះបរមសព ទៅតាមព្រះរាជកម្មវិធី៕
