នាយករដ្ឋមន្ត្រីទីម័រខាងកើត ជួបជាមួយលោក ហេង សំរិន
ភ្នំពេញ៖ នៅព្រឹកថ្ងៃទី៦ ខែកញ្ញានេះ នាយករដ្ឋមន្ត្រីទីម័រខាងកើត(East Timor) ដែលបានទទួលការគាំទ្រពីលោកនាយករដ្ឋមន្រ្តី ហ៊ុន សែន ក្នុងការស្នើសុំចូលជាសមាជិកASEAN នឹងដាក់កម្រងផ្កានៅវិមានឯករាជ្យ បន្ទាប់មកលោកនឹងជួបជាមួយប្រធានរដ្ឋសភា លោក ហេង សំរិន។
កាល ពីថ្ងៃព្រហស្បតិ៍ នាយករដ្ឋមន្ត្រីទីម័រខាងកើត លោក កៃ រ៉ាឡា សាណាណា ហ្គោសម៉ៅ( Kay Rala Xanana Gusmao) បានមកដល់កម្ពុជា ដោយលោកបានជួបពិភាក្សាការងារជាមួយសមភាគី លោក ហ៊ុន សែន។ ក្នុងជំនួបនោះ លោកនាយករដ្ឋមន្ត្រី បានសម្តែងការគាំទ្រឲ្យប្រទេសទីម័រខាងកើត ចូលជាសមាជិកអាស៊ាន។
ក្នុងកិច្ចពិភាក្សានោះ រដ្ឋមន្ត្រីក្រសួងពាណិជ្ជកម្មកម្ពុជា លោក ចម ប្រសិទ្ធ និងរដ្ឋមន្ត្រីក្រសួងទេសចរណ៍របស់ទីម័រខាងកើត ក៏បានចុះហត្ថលេខាលើអនុស្សរណៈនៃការយោគយល់គ្នា ស្តីពីការអភិវឌ្ឍផ្នែកពាណិជ្ជកម្ម និងបច្ចេកទេស រវាងប្រទេសទាំងពីរ។
សេចក្តីជូនព័ត៌មានរបស់ក្រសួងការបរទេស ឲ្យដឹង លោក កៃ រ៉ាឡា សាណាណា ហ្គោសម៉ៅ( Kay Rala Xanana Gusmao) នឹងមកបំពេញទស្សនកិច្ចជាផ្លូវការនៅកម្ពុជា ចាប់ពីថ្ងៃទី ៥ ដល់ ថ្ងៃទី៨ខែកញ្ញា តាមការអញ្ជើញរបស់នាយករដ្ឋមន្ត្រីកម្ពុជា លោក ហ៊ុន សែន។ សេចក្តីជូនព័ត៌មានបន្តថា នាយករដ្ឋមន្ត្រីរូបនេះ នឹងបន្តទៅទស្សនាប្រាសាទអង្គរវត្តនៅខេត្តសៀមរាប។ លោកគ្រោង នឹងត្រឡប់ទៅប្រទេសវិញ នៅថ្ងៃចន្ទ សប្តាហ៍ក្រោយ។
កាលពី ឆ្នាំ២០១០ នាយករដ្ឋមន្ត្រីប្រទេសទីម័រខាងកើត ធ្លាប់បានមកធ្វើទស្សនកិច្ចនៅកម្ពុជារួចមកហើយ ក្នុងគោលបំណងជួបជាមួយនិស្សិតកម្ពុជានៅរាជធានីភ្នំពេញ ដើម្បីពិភាក្សាអំពីវប្បធម៌នៃការកសាងសន្តិភាព និងការអភិវឌ្ឃនៅក្នុងពិភពលោក។
លោក Gusmao បានក្លាយជានាយករដ្ឋមន្ត្រី East Timor ចាប់តាំងពីឆ្នាំ២០០៧ ហើយលោកគឺជាម្ចាស់រង្វាន់ ស៊ីដនី សន្តិភាពមួយរូប ។ កម្ពុជា បានក្លាយជាសមាជិកទី១០ ចុងក្រោយនៃអាស៊ាន កាលពីថ្ងៃទី៣០ខែមេសា ឆ្នាំ១៩៩៩៕ Cambodia News
