គ្រោះរញ្ជួយដីនៅប៉ាគីស្ថាន ស្លាប់ជាង២៥០នាក់
គ្រោះ រញ្ជួយដីកម្រិត៧,៧វ៉ិចទ័រ បានវាយប្រហារខេត្តបាលូតឈីស្ថាន ភាគនិរតីប្រទេស ប្រទេសប៉ាគីស្ថាន កាលពីថ្ងៃអង្គារម្សិលមិញ បណ្តាលអោយមានមនុស្សជាង២៥០នាក់ ស្លាប់បាត់បង់ជីវិត។ អាជ្ញាធរប៉ាគីស្ថាន បានដាក់មួយភាគនៃខេត្តបាលូតឈីស្ថាន ក្នុងស្ថានភាពប្រកាសអាសន្ន។ នៅថ្ងៃពុធនេះ កងទ័ពប៉ាគីស្ថានបានចុះទៅជួយជនរងគ្រោះក្នុងតំបន់។ កម្លាំងនៃគ្រោះរញ្ជួយដីនេះ ក៏បានធ្វើអោយ ប្រជាជនឥណ្ឌា និងអ៊ីរ៉ង់ ដែលនៅក្បែរនោះ បានដឹងពីហេតុការណ៍នេះផងដែរ។
ក្នុងកម្រិត ៧,៧វ៉ិចទ័រ ដែលជាកម្រិតខ្ពស់ គ្រោះរញ្ជួយដីនេះ បានសម្លាប់មនុស្សយ៉ាងសន្ធឹកសន្ធាប់។ វាបានបំផ្លាញសង្កាត់ចំនួន៦ ក្នុងខេត្តបាលូតឈីស្ថាន ធ្វើអោយប្រជាជន៣សែននាក់រងគ្រោះ។
អាទិភាព បន្ទាន់នៅពេលនេះ គឺការបញ្ជូនអ្នករបួសទៅមន្ទីរពេទ្យអោយបានរហ័សបំផុត។ បញ្ហាគឺថា អាជ្ញាធរខ្វះសេវាសុខភាព ដើម្បីជួយជនរងគ្រោះ។ ក្នុងតំបន់រងគ្រោះ គ្មានមន្ទីរពេទ្យសោះឡើយ។ អាជ្ញាធរបានដឹកអ្នករបួសធ្ងន់ទាំងឡាយ តាមឧទ្ធម្ភាគចក្រ ទៅការ៉ាឈី និងទៅកាន់សង្កាត់ជិតខាងក្បែរនោះ។ គ្រូពេទ្យ១០០នាក់ និងកងទ័ព១០០០នាក់ ក៏បានចុះទៅក្នុងតំបន់រងគ្រោះហើយដែរ។ នៅក្នុងភូមិ តារទីជ អាជ្ញាធរក៏បានបង្កើតទីកន្លែងព្យាបាលជនរងគ្រោះភ្លាមៗផងដែរ។
មួយភាគនៃខេត្តបាលូតឈីស្ថានត្រូវបានដាក់ក្នុងការប្រកាសស្ថានភាព អាសន្ន។ បន្ទាប់ពីមានហេតុការណ៍គ្រោះរញ្ជួយដីនេះកើតឡើង វិទ្យាស្ថានភូមិសាស្ត្រ-រូបវិទ្យាអាមេរិក បានប្រកាសអោយមានការប្រុងប្រយ័ត្នកម្រិតខ្ពស់ ព្រោះថា គ្រោះរញ្ជួយដីក្នុងកម្រិតខ្ពស់បែបនេះ អាចបណ្តាលអោយមានមនុស្សស្លាប់ច្រើនថែមទៀត។
ខេត្តបាលូតឈីស្ថានជាខេត្តដ៏ធំ មានប្រជាជនរស់នៅតិចជាងខេត្តដទៃទៀត។ គឺជាខេត្តក្របំផុតក្នុងប្រទេស។ ក្នុងខេត្តនេះ សំបូងហិង្សាប្រឆាំងនឹងអ្នកកាន់សាសនាអ៊ីស្លាមនិកាយស៊ីអ៊ីត ហើយក៏ជាទីកន្លែង វាយប្រហាររបស់ក្រុមឧទ្ទាមតាលីបង់ផងដែរ។ លើសពីនេះ ខេត្តបាលូតឈីស្ថាននេះ ជាទីប្រឈមមុខរវាងក្រុមឧទ្ទាមដែលមានឈ្មោះថា កងទ័ពរំដោះបាលូឈីស្ថាន និងកងទ័ពរដ្ឋាភិបាល។
ដោយឡែក គ្រោះរញ្ជួយដីកាលពីថ្ងៃអង្គារម្សិលមិញ បានផ្តុំផ្ទាំងថ្មបង្កើតបានជាកោះមួយ កំពស់រហូតដល់ទៅ៣០ម៉ែត្រ នៅឆ្នេរសមុទ្រអារ៉ាប៊ី។ ហេតុការណ៍នេះ ធ្លាប់កើតមានម្តងរួចមកហើយ នៅទីកន្លែងដដែលនេះដែរ កាលពី៦០ឆ្នាំមុន៕ដោយ ព្រំ សឿន សូលីណា (RFI)
