បន្ទាប់ពីការសម្លាប់ គីម ជុង ណាម ម៉ាឡេស៊ីរឹតបន្តឹងសន្តិសុខនៅចំណុចច្រកចូល
សារព័ត៌មាន Cambodia News/
ម៉ាឡេស៊ី (១៧ កុម្ភៈ ២០១៧) ៖ បន្ទាប់ពីលោក គីម ជុងណាម ដែលជាបងប្រុសម្តាយទីទៃរបស់មេដឹកនាំកូរ៉េខាងជើង លោក គីម ជុង អ៊ុន ត្រូវបានសម្លាប់ កាលពីថ្ងៃចន្ទទី១៣កុម្ភៈមក នៅចំណុចច្រកចូលទាំងអស់នៅប្រទេសម៉ាឡេស៊ីត្រូវបានរឹតបន្តឹងសន្តិសុខ។
លោក អាប់ឌុល សាម៉ា ម៉ាត (Abdul Samah Mat) មេប៉ូលិសនៅរដ្ឋសេឡាន់ហ្គ័រ (Selangor) បាននិយាយថា ចំណាត់ការសន្តិសុខទាំងនេះ គឺរួមបញ្ចូលទាំងការរឹតបន្តឹងសន្តិសុខខ្លាំងនៅច្រកចេញចូលនៅអាកាសយានដ្ឋានអន្តជាតិក្រុងគូឡាឡាំពួ (KLIA) និងនៅអាកាសយានដ្ឋានអន្តជាតិក្រុងគូឡាឡាំពួ២ (KLIA2)។
រហូតមកដល់ពេលនេះ ចំពោះការទាក់ទងការសម្លាប់លោក គីម ជុងណាម កាលពីថ្ងៃចន្ទនោះស្ត្រីជនជាតិឥណ្ឌូនេស៊ីម្នាក់ និងមិត្តប្រុសជនជាតិម៉ាឡេស៊ីរបស់នាង និងស្ត្រីម្នាក់ផ្សេងទៀត ដែលកាន់លិខិតឆ្លងដែនវៀតណាម ត្រូវបានចាប់ខ្លួន។
សាកសពរបស់លោក គីម ជុងណាម ត្រូវបានធ្វើកោសល្យវិច្ឆ័យ កាលពីថ្ងៃពុធទី១៥ កុម្ភៈ ប៉ុន្តែរហូតមកដល់ពេលនេះ គេមិនទាន់ឃើញនរណាម្នាក់មកអះអាងទទួលយកសាកសពនេះទេ៕
