ប្រធានបទទិវាសេរីភាពសារព័ត៌មានពិភពលោកឆ្នាំនេះ នឹងជជែកគ្នាពី “តួនាទីរបស់ប្រព័ន្ធផ្សព្វផ្សាយ ក្នុងការគាំទ្រសន្តិភាព និងប្រជាធិបតេយ្យ”
សារព័ត៌មាន Cambodia News/
ភ្នំពេញ (២ ឧសភា ២០១៩) ៖ ជារៀងរាល់ឆ្នាំ ថ្ងៃទី០៣ ខែឧសភា គឺជាថ្ងៃដែលគេប្រារព្ធគោលការណ៍គ្រឹះនៃសេរីភាពសារព័ត៌មាន និងជាឱកាសមួយដើម្បីលើកទឹកចិត្ត និងបង្កើតគំនិតផ្តួចផ្តើម ដើម្បីលើកស្ទួយសេរីភាពនៃការបញ្ចេញមតិ សេរីភាពសារព័ត៌មាន និងសេរីភាពក្នុងការទទួលបានព័ត៌មាន។
សម្រាប់ឆ្នាំនេះ ក្រសួងព័ត៌មាន សហការពីអង្គការយូណេស្កូ និងដៃគូពាក់ព័ន្ធជាច្រើនទៀត នឹងរៀបចំពិធីអបអរសាទរ ទិវាសេរីភាពសារព័ត៌មានពិភពលោក នាថ្ងៃទី០៣ ខែឧសភា ឆ្នាំ២០១៩ ខាងមុខនេះ នៅសណ្ឋាគារឡឺរ៉ូយ៉ាល់ រាជធានីភ្នំពេញ។
ការប្រារព្ធទិវាសេរីភាពសារព័ត៌មានពិភពលោកលើកទី២៦នេះ នឹងប្រព្រឹត្តទៅក្រោម ប្រធានបទ៖ “តួនាទីរបស់ប្រព័ន្ធផ្សព្វផ្សាយ ក្នុងការគាំទ្រសន្តិភាព និងប្រជាធិបតេយ្យ” ។
ភាគីពាក់ព័ន្ធជាច្រើន ដូចជាមន្រ្តីរាជរដ្ឋាភិបាល អ្នកសារព័ត៌មាន តំណាងអង្គការសហប្រជាជាតិ អង្គការមិនមែនរដ្ឋាភិបាល និងដៃគូអភិវឌ្ឍន៍នានា ។ល។ នឹងចូលរួមក្នុងព្រឹត្តិការណ៍នេះ ដើម្បីពិភាក្សាគ្នាអំពីការចូលរួមរបស់ប្រព័ន្ធផ្សព្វផ្សាយក្នុងការគាំទ្រសន្តិភាព និងប្រជាធិបតេយ្យ។
គួរបញ្ជាក់ថា ថ្ងៃទី០៣ ខែឧសភា ត្រូវបានប្រកាសជាទិវាសេរីភាពសារព័ត៌មានពិភពលោក នៅក្នុងមហាសន្និបាតអង្គការសហប្រជាជាតិនៅឆ្នាំ១៩៩៣ បន្ទាប់ពីអនុសាសន៍ត្រូវបានអនុម័តឡើង នៅក្នុងសន្និសីទទូទៅរបស់អង្គការយូណេស្កូ លើកទី២៦ នៅឆ្នាំ១៩៩១៕
