អ្នកភូមិបុរីកីឡា ៧នាក់ត្រូវបានតុលាការដោះលែង
នៅថ្ងៃទី១៨ កុម្ភៈ ២០១២ អ្នកភូមិបូរីកីឡា ចំនួន៧នាក់ ដែលត្រូវចាប់ខ្លួននៅក្នុងការប៉ះទង្គិចដោយហិង្សា នៅពេលអាជ្ញាធរឈូសឆាយផ្ទះសម្បែងពួកគេ កាលពីថ្ងៃទី៣ មករា ២០១២ ត្រូវបានដោះលែងពីពន្ធនាគារអស់ហើយ។
ការដោះលែងនេះធ្វើឡើងភ្លាមៗបន្ទាប់ពីលោក ជា សុខហៀង ដែលជាចៅក្រមសាលាដំបូងរាជធានីភ្នំពេញ បានចេញដីកាសម្រេចដោះលែងពួកគេអោយនៅក្រៅឃុំ។
លោក អំ សំអាត អ្នកគ្រប់គ្រងបច្ចេកទេសការិយាល័យស៊ើបអង្កេតនៃអង្គការសិទ្ធិមនុស្ស លីកាដូបាននិយាយថា លោកសាទរចំពោះការអនុញ្ញាតអោយអ្នកភូមិបូរីកីឡាបាននៅក្រៅឃុំ។ ប៉ុន្តែចំណុចដែលសំខាន់ គឺការផ្ដល់ដំណោះស្រាយសមរម្យដល់អ្នកភូមិ ដែលក្រុមហ៊ុន និងអាជ្ញាធរត្រូវយកចិត្តទុកដាក់ គឺយើងគួរតែរកវិធីដោយសន្តិភាពក្នុងការចរចារកដំណោះស្រាយ ដោយសន្តិវិធីធ្វើយ៉ាងណាអោយមានការយល់ព្រមគ្នាកុំអោយមានអំពើហិង្សាកើតឡើង៕
