ក្មេងប្រុសម្នាក់ត្រូវចរន្តអគ្គីសនីឆក់ ខណៈពេលដែលបញ្ជូនថ្មទូរស័ព្ទ ហើយដោតកាសស្តាប់ចម្រៀង
សារព័ត៌មាន Cambodia News/
ភ្នំពេញ (២៣ ឧសភា ២០១៧) ៖ ក្មេងប្រុសអាយុ១៣ឆ្នាំម្នាក់ត្រូវចរន្តអគ្គីសនីឆក់ ចេញឈាមតាមមាត់ និងត្រចៀករងរបួសធ្ងន់ ខណៈពេលដែលបញ្ជូនថ្មទូរស័ព្ទ ហើយដោតកាសស្តាប់បទចម្រៀង កាលពីវេលាម៉ោង០៩និង៤០នាទីព្រឹកថ្ងៃទី២២ខែឧសភា ឆ្នាំ២០១៧ ស្ថិតនៅត្រង់ចំណុចតូបលក់បាយមុខរោងចក្រកាត់ដេរយីហោ ព្រីនឆយ ស្ថិតនៅតាមបណ្តោយផ្លូវលេខ៥៩៨ ក្រុមទី៨ ភូមិខ១ សង្កាត់ច្រាំចំរេះទី២ ខណ្ឌឬស្សីកែវ ។
ក្មេងប្រុស ដែលត្រូវចរន្តអគ្គីសនីឆក់នោះឈ្មោះ ណៃ សំណាង អាយុ១៣ឆ្នាំ ជាសិស្សថ្នាក់ទី៦ នៃសាលាបឋមសិក្សាជាស៊ីមចំរើនរដ្ឋ ស្នាក់នៅកន្លែងកើតហេតុខាងលើ ។ តាមប្រពព័ត៌មានពីកន្លេងកើតហេតុបានឱ្យដឹងថា នៅមុនពេលកើតហេតុគេឃើញក្មេងរងគ្រោះបានបញ្ចូលថ្មទូរស័ព្ទម៉ាក សាំស៊ុង ព្រមទាំងដោតកាសស្តាប់ចម្រៀងពេលកំពុងតែបញ្ចូលថ្មទូរស័ព្ទ ។
នៅពេលកំពុងតែស្តាប់ចម្រៀងស្រាប់តែឆ្លងចរន្តអគ្គីសនី ឆក់ប្រកាច់ សន្លប់ដេកស្តូកស្ដឹង និងចេញឈាមតាមម៉ាត់ និងត្រចៀក ។ តាមព័ត៌មានឲ្យដឹងទៀតថាភ្លាមៗនោះត្រូវបានប្រជាពលរដ្ឋដែលរស់នៅក្បែរនោះនាំគ្នា ជួយសែងយកទៅកប់ដីខ្សាច់ធ្វើចលនា រយៈពេលប្រមាណកន្លះម៉ោងនៅមិនដឹងខ្លួនក៏បានហៅម៉ូតូកង់បី បញ្ជូនទៅសង្គ្រោះនៅមន្ទីរពេទ្យឯកជននៅក្បែរកន្លែងកើតហេតុសង្គ្រោះទាន់ពេល ៕
