ប្រយ័ត្នជួបទុក្ខធំ អ្នកបើកបរយានយន្ត គ្មានប័ណ្ណបើកបរ គ្មានផ្លាកលេខ
សារព័ត៌មាន Cambodia News/
ភ្នំពេញ (២៣ ឧសភា ២០១៧) ៖ យោងតាមច្បាប់ស្ដីពីវិសោធនកម្ម នៃច្បាប់ចរាចរណ៍ផ្លូវគោក ដែលត្រូវបានប្រកាសដោយព្រះរាជក្រម លេខ នស/រមក/ ០១១៥/០០១ ចុះថ្ងៃទី ៩ខែមករា ឆ្នាំ ២០០៩ មាត្រា៧៥ថ្មី បានឱ្យដឹងថា ប្រសិនបើបងប្អូនប្រជាពលរដ្ឋបើកបរយានយន្តដោយគ្មានប័ណ្ណបើកបរ ឬក្នុងរយៈពេលប័ណ្ណបើកបរត្រូវដកហូត ព្យួរទុក ឬទុកជាមោឃៈ ត្រូវពិន័យអន្តរការណ៍តាមការកំណត់នៃអនុក្រឹត្យ។
តាមច្បាប់ត្រូវពិន័យពី ៨០០ ០០០ (ប្រាំបីសែន) រៀល ទៅដល់ ៤ ០០០ ០០០ (បួនលាន) រៀល និងត្រូវផ្ដន្ទាទោសដាក់ពន្ធធនាគារពី ១ ទៅដល់ ៦ខែ ទៀតផង។ចំណែកបងប្អូនប្រជាពលរដ្ឋ ដែលបើកបរ គ្មានប័ណ្ណសម្គាល់យានយន្ត ឬផ្លាកលេខវិញ បើយោងតាម មាត្រា ៨២ បានឱ្យដឹងថា នឹងត្រូវផ្ដន្ទាទោសដាក់ពន្ធធនាគារ ពី៦ថ្ងៃ ទៅដល់ ១ខែ ហើយត្រូវពិន័យជាទឹកប្រាក់ ពី ៤០០ ០០០ (បួនសែន) រៀល ទៅ ១ ០០០ ០០០ (មួយលាន) រៀល ឯណោះ។
ដូច្នេះសូមបងប្អូនប្រជាពលរដ្ឋគោរពច្បាប់ឱ្យបានខ្ជាប់ខ្ជួន ដើម្បីចូលរួមធ្វើឱ្យសង្គមជាតិមានសណ្ដាប់ធ្នាប់ និងជាពិសេសការបើកបរត្រូវប្រុងប្រយ័ត្ន ហើយអនុវត្តតាមច្បាប់ចរាចរណ៍ ដើម្បីកាត់បន្ថយបញ្ហាគ្រោះថ្នាក់ ដែលតែងតែកើតមានជារៀងរាល់ថ្ងៃ៕
