AZចាប់ផ្តើមជំរុញការអនុវត្តសំណើរបស់ប្រមុខរាជរដ្ឋាភិបាល
ហេង នាង
សារព័ត៌មាន Cambodia News
ភ្នំពេញ៖ បន្ទាប់ពីមានការស្នើសុំពីសម្តេចតេជោ ហ៊ុន សែន កាលពីថ្ងៃអង្គារកន្លងមកនេះ ក្រុមហ៊ុន អេហ្សិត អ៊ិនវេសមិន (AZ Investment Co., Ltd) បានចាប់ផ្តើមអនុវត្តលើកលែងការបង់ប្រាក់សម្រាប់អ្នករស់នៅតាមតំបន់នៃបណ្តោយផ្លូវជាតិលេខ៤ ដែលមានរថយន្តជាលក្ខណៈគ្រួសារ ចាប់ពីម៉ោង ០០:០០នាទី នាថ្ងៃទី៧ មករា នេះ។
លោក ជួន វ៉ាន់ឌន នាយកចាត់ការទូទៅនៃក្រុមហ៊ុន AZ Investment Co., Ltd បានប្រាប់សារព័ត៌មានCambodia News នៅថ្ងៃនេះថា ចាប់តាំងពីការប្រកាសមក មានមនុស្សប្រមាណ៥០០នាក់ហើយបានមកយកពាក្យសុំ ដើម្បីស្នើការលើកលែងសេវាប្រើប្រាស់ផ្លូវជាតិលេខ៤ ហើយគិតមកត្រឹមថ្ងៃទី៧នេះ មានទើបតែ៥០នាក់ប៉ុណ្ណោះដែលបានយកពាក្យមកដាក់។
លោកបានបញ្ជាក់ថា បើតាមគោលការណ៍ដែលបានឯកភាពពីក្រសួងសេដ្ឋកិច្ច និងហិរញ្ញវត្ថុ និងក្រសួងសាធារណការ និងដឹកជញ្ជូន គឺអនុញ្ញាតឲ្យប្រជាពលរដ្ឋ និងមន្ត្រីរាជការដែលរស់នៅតាមបណ្តោយផ្លូវជាតិលេខ៤ និងតំបន់ក្បែរនោះ ដែលប្រើប្រាស់រថយន្តជាលក្ខណៈគ្រួសារ គឺមិនចាំបាច់បង់សេវាផ្លូវនោះទេ ព្រោះពួកគាត់បានធ្វើដំណើរជាញឹកញាប់ និងជាប្រចាំ។
លោក ជួន វ៉ាន់ឌន បានអះអាងថា ក្រុមហ៊ុននឹងអនុវត្តតាមការស្នើសុំពីរាជរដ្ឋាភិបាល ដើម្បីជួយសម្រួលឲ្យម្ចាស់រថយន្តរជាលក្ខណៈគ្រួសារ ដែលធ្វើដំណើរជាញឹកញាប់និងជាប្រចាំ ហើយកិច្ចការនេះ ក្រុមហ៊ុនបានធ្វើខ្លះរួចហើយកាលពីពេលកន្លងមក។
គួរបញ្ជាក់ថា នៅក្នុងពិធីសម្ពោធស្ពានអាកាស៥មករា កាលពីព្រឹកថ្ងៃទី ៥ មករា សម្តេចតេជោ ហ៊ុន សែន បានប្រកាសឲ្យក្រសួងសេដ្ឋកិច្ច និងហិរញ្ញវត្ថុ និងក្រសួងសាធារណការ និងដឹកជញ្ជូន ជួយពិនិត្យលើបញ្ហានេះ។
នៅក្នុងលិខិតរួមមួយរបស់ក្រសួងសេដ្ឋកិច្ច និងហិរញ្ញវត្ថុ និងក្រសួងសាធារណការ និងដឹកជញ្ជូនដែល បានផ្ញើជម្រាបជូនលោកឧកញ៉ា លឹម រស់ អគ្គនាយក្រុមហ៊ុន AZ Investment Co., Ltd បានរៀបរាប់អំពីសំណើរបស់ប្រមុខរាជរដ្ឋាភិបាលស្ដីពីការលើកលែងការបង់កម្រៃថែទាំផ្លូវជាតិលេខ៤ចំពោះប្រជាពលរដ្ឋដែលរស់នៅតាមដងផ្លូវជាតិលេខ៤។
លោក វ៉ាន់ឌន បានលើកឡើងថា ដើម្បីជំរុញឲ្យកិច្ចការនេះបានកាន់តែលឿន ក្រុមហ៊ុន AZ Investment Co., Ltd បានបង្កើនការផ្សព្វផ្សាយ ដោយចែកចាយបណ្ណព័ត៌មាន ពិសេសលិខិតរបស់ក្រសួងសេដ្ឋកិច្ច និងហិរញ្ញវត្ថុ និងក្រសួងសាធារណៈការ និងដឹកជញ្ជូន រាប់ពាន់សន្លឹកឲ្យអ្នកធ្វើដំណើរតាមដងផ្លូវជាតិលេខ៤ ព្រមទាំងមានបដាធំៗបង្ហាញពីព័ត៌មាននេះនៅកន្លែងបង់ប្រាក់ផងដែរ៕
