ក្មេងទំនើងបួននាក់ត្រូវនគរបាលធ្វើការឃាត់ខ្លួន
កាលពីវេលាម៉ោង ១ និង ៤០ នាទីរសៀលថ្ងៃទី ០៩ខែមករា សមត្ថកិច្ចនគរបាលខណ្ឌដង្កោបានឃាត់ខ្លួនក្មេងទំនើងចំនួន បួននាក់ នៅតាមបណ្តោយផ្លូវចំការដូង ក្នុងភូមិថ្មី សង្កាត់ដង្កោ ខណ្ឌដង្កោ បន្ទាប់ពីក្មេងទំនើងទាំងបួននាក់នេះបានធ្វើសកម្មភាពដេញវាយកាប់ចាក់គ្នាយ៉ាងអាណាធិបត្តេយ្យ។
សាក្សីដែលបានឃើញហេតុការណ៍ខាងលើនេះបានឲ្យដឹងថាមុនពេលកើតហេតុគេ សង្កេតឃើញភាគីក្មេងទំនើងទាំងពីរក្រុម មួយក្រុមមានគ្នាពីរនាក់នឹងមួយក្រុមទៀតក៏មានគ្នាពីរនាក់ដូចគ្នា ប៉ុន្តែក្មេងទំនើងទាំងនេះគឺស្ថិតក្នុងភាពស្រវឹងទាំងអស់បាននាំគ្នា ដើរតាមបណ្តោយផ្លូវចំការដូង រហូតពួកគេនិយាយពាក្យ ឌឺដងគ្នា ឈានដល់ការដេញវាយកាប់ចាក់គ្នាផ្អើលអ្នកដំណើរ និងប្រជាពលរដ្ឋរួមជាមួយនិងនគរបាលមូលដ្ឋាន ចុះមកអន្តរាគមន៍ឃាត់ខ្លួនពួកគេបានភ្លាមៗយកមកកាន់អធិការដ្ឋាននគបាល ខណ្ឌដង្កោដើម្បីធ្វើការសាកសួរពីមូលហេតុដែលពួកគេដេញវាយគ្នាបង្ក ឲ្យភាពអាណាធិបត្តេយ្យតាមដងផ្លូវបែបនេះ។
សមត្ថកិច្ចនៅមិនទាន់អាចបញ្ជាក់ពីអត្តសញ្ញាណក្មេងទំនើងទាំងបួន នាក់ខាងលើនេះបាននៅឡើយទេ បច្ចុប្បន្នក្មេងទំនើងបួននាក់ដែលសមត្ថកិច្ចឃុំខ្លួនបណ្តោះអាសន្ននៅ អធិការដ្ឋាននគរបាលដើម្បីរងចាំកសាងសំណុំរឿងបញ្ជូនចាត់ការបន្តទៀត៕
ដោយ៖ ហេង នាង
