ក្រោយមានមនុស្សម្នាក់បានស្លាប់នៅក្នុងរោងចក្រ នាំគ្នាភ័យដួលសន្លប់៤០នាក់
សារព័ត៌មាន Cambodia News/
ភ្នំពេញ (០២ ឧសភា ២០១៧) ៖ កម្មការិនីរោងចក្រកាត់ដេរសម្លៀកបំពាក់យីហោ «អាខាសេ ហ្គាមិន» ស្ថិតតាមបណ្ដោយផ្លូវជាតិលេខ៣ ក្នុងសួនឧស្សាហកម្មវឌ្ឍនៈ២ ភូមិទឹកថ្លា សង្កាត់ក្រាំងពង្រ ខណ្ឌដង្កោ រាជធានីភ្នំពេញ ចំនួន៤០នាក់បានដួលសន្លប់បន្តបន្ទាប់ បង្កការភ្ញាក់ផ្អើលកាលពីវេលាម៉ោង០៨ និង៣០នាទីព្រឹកថ្ងៃទី២ មិថុនា នេះ ។
ករណីនេះ ត្រូវគេសង្ស័យអាចបណ្ដាលមកពីអារម្មណ៍ភ័យខ្លាច បន្ទាប់ពីមានកម្មការិនីម្នាក់ដួលស្លាប់ពេលចូលបន្ទប់ទឹក នៅក្នុងរោងចក្រ ដោយសារជម្ងឺលើសឈាម កាលពី២ថ្ងៃកន្លងមកនោះ ។
តាមប្រភពថា នៅមុនពេលកើតហេតុ កម្មករកម្មការិនី បានចូលទៅធ្វើការជាធម្មតា ប៉ុន្តែខណៈពេលធ្វើការបានត្រឹមតែជាង១ម៉ោងប៉ុណ្ណោះ ក៏ស្រាប់តែមានអ្នកដួលជាបន្តបន្ទាប់គ្នាចំនួន៤០នាក់ ដែលពេលនោះ បានបង្កឲ្យមានការច្របូកច្របល់ពេញក្នុងរោងចក្រ ។
ពួកគេមានអាការៈទន់ ដៃទន់ជើង និងងងឹតមុខ អស់កម្លាំង រួចក៏បានដួលសន្លប់តែម្ដង ៕
