ប្រជាជនបន្តដាក់តវ៉ា ចំពោះបញ្ហាមិនបានបោះឆ្នោត
ភ្នំពេញ ៖ ប្រជាជនដែលមិនមានឈ្មោះបោះឆ្នោតឬ ក៏ មិនបានបោះឆ្នោតនៅតែបន្តការតវ៉ានៅទី ស្នាក់ការគណបក្សសង្គ្រោះជាតិអូរបែកខ្អម ដើម្បីចុះឈ្មោះប្ដឹងទៅ គ ជ ប ទាមទារកភាពយុត្តិធម៌ក្នុងការមិនបានបោះឆ្នោតដូចប្រជាពលរដ្ឋខ្មែរដទៃ។
បើតាមសម្ដីរបស់លោក ហ៊ូ វ៉ាន់ ដែលជាតំណាងរាស្ត្រ ខេត្ត កណ្ដាល បានឲ្យដឹងថាមកដល់ពេលនេះមានប្រជាជន ចំនួន១៤០០នាក់ ហើយ បានមកដាក់ពាក្យបណ្ដឹងនៅទីស្នាក់ការសង្គ្រោះជាតិ ក្នុងរយៈពេលពីរថ្ងៃ គឺថ្ងៃទី ៣១ និង ថ្ងៃទី ១កន្លងទៅនេះ។
លោក ហ៊ូ វ៉ាន់ បានបន្តទៀតថា« បណ្ដឹងទាំងនោះ មានដូចជា កក្ដាបាត់ឈ្មោះមិនបានបោះឆ្នោត កត្តាខុសឈ្មោះ ខុសថ្ងៃខែ ឆ្នាំកំណើត ហើយមួយចំនួនទៀត មានឈ្មោះតែ ត្រូវបានគេបោះជំនួសរួចហើយ។»
លោក បានបន្ថែមថា ឈ្មោះប្រមូលបានពីការតវ៉ារបស់ប្រជាពលរដ្ឋ ទាំងប៉ុន្មាននឹងត្រូវដាក់ប្ដឹងទៅកាន់ គ ជ ប អោយជួយ ដោះស្រាយធ្វើយ៉ាងណា ដើម្បីរៀបចំការបោះឆ្នោតមួយសម្រាប់ពួកគាត់ ដែលមិនទាន់បានបោះឆ្នោត។ ហើយបើសិនជា គ ជ ប នៅតែមិនព្រមធ្វើអន្តាគមន៍ទេនោះ ក្រុមការងារគណបក្សសង្គ្រោះជាតិនឹងបញ្ជូនឈ្មោះទាំងនោះទៅកាន់គណកម្មាធិការចំរុះដោះស្រាយ។
បើតាមសម្ដីរបស់ អ្នកស្រី អ៊ុំ ណាវ៉េត ដែលត្រូវបោះឆ្នោតនៅសង្កាត់ទួលសង្កែរ បាននិយាយថា គាត់មកចុះឈ្មោះទាមទារការបោះឆ្នោត ព្រោះគាត់ បានបោះឆ្នោតគ្រប់អាណត្តិទាំងអស់ តែអាណត្តិនេះគាត់រកឈ្មោះរបស់គាត់មិនឃើញដូច្នេះ គាត់មិនបានបោះឆ្នោតទេ។
អ្នកស្រី ពត គន្ធា ដែលត្រូវបោះឆ្នោតនៅ ស្ទឹងមានជ័យ បានមកចុះឈ្មោះតវ៉ានេះ បាននិយាយថា អ្នកស្រីទទួលបានចុងសន្លឹកសម្រាប់បោះឆ្នោតហ្នឹង មុនការបោះឆ្នោត តែដល់ថ្ងៃបោះឆ្នោតអ្នកស្រីនៅតែរកឈ្មោះមិនឃើញ។
ក្នុងនាមជាកូនខ្មែរ មួយរូបអ្នកស្រីាបានបន្តថា «ខ្ញុំមានការតូចចិត្តយ៉ាងខ្លាំងដែលមិនបានបោះឆ្នោត» ហើយអ្នកស្រីសង្ឃឹមថា ការមកចុះឈ្មោះដាក់ពាក្យបណ្ដឹងនេះ អាចជួយឲ្យអ្នកស្រីទទួលបានឈ្មោះបោះឆ្នោតវិញ។
គួរបញ្ជាក់ផងដែរថា ការបើកឲ្យមានការតវ៉ានេះត្រូវបានធ្វើឡើងនៅតាម ឃុំ សង្កាត់ ដោយប្រជាជនមិនចាបាច់មកដល់ទី ស្នាក់ការគណបក្សសង្គ្រោះជាតិទេ។ ចំនួនឈ្មោះថ្មីៗនឹងសរុបនៅពេលល្ងាចនេះ ហើយការតវ៉ាទាមទាររកឈ្មោះបោះឆ្នោតនេះ នឹងត្រូវបញ្ចប់នៅថ្ងៃទី៦ កក្កដាខាងមុខនេះ៕ បេឡា/Cambodia News
