ទណ្ឌិតថៃឈប់ប្ដឹងតទៅទៀតហើយ
ទណ្ឌិតជាជនជាតិថៃ ហើយជាសកម្មជនរបស់ក្រុមអាវលឿងពីរនាក់ គឺលោក វីរៈ ស៊ុមក្វាមឃីត និងអ្នកស្រី រ៉ាទ្រី ភិប៉ាតាណាប៉ៃប៊ូន ត្រូវបានតុលាការសាលាឧទ្ធរណ៍កម្ពុជាកោះហៅមកសាកសួរនៅថ្ងៃទី ២៨ ធ្នូ ឆ្នាំ ២០១១ នេះពីរឿងពួកគេមិនប្ដឹងឧទ្ធរណ៍វិញ។
អ្នកទាំងពីរ ដែលបានជាប់ទោសក្នុងបទចារកម្ម និងឆ្លងដែនខុសច្បាប់ចូលទឹកកម្ពុជាបានប្រាប់តុលាការថា ពួកគេបានព្រមដកពាក្យបណ្ដឹង ហើយឈប់ប្ដឹងឧទ្ធរណ៍ជំទាស់នឹងការសម្រេចរបស់តុលាការសាលាដំបូងរាជធានីភ្នំពេញហើយ។
មន្ត្រីតុលាការមួយរូបបាននិយាយថា ការឈប់ប្ដឹងរបស់ទណ្ឌិតថៃទាំងពីររូបនេះ គឺដើម្បីងាយស្រួលឈានទៅស្នើសុំព្រះមហាក្សត្រខ្មែរឲ្យផ្ដល់ព្រះរាជទានទោស និងបានវិលត្រឡប់ទៅផ្ទះវិញ៕
លោក រស់ អូន មេធាវីការពារក្ដីឲ្យទណ្ឌិតថៃទាំងពីរបានប្រាប់អ្នកយកព័ត៌មាននៅឯសាលាឧទ្ធរណ៍ថា ចៅក្រមគ្រាន់តែសាកសួរបន្ថែមដល់ទណ្ឌិតទាំងពីរនាក់ ពីរឿងដែលខ្លួនបានសម្រេចចិត្តជាផ្លូវការដកពាក្យបណ្ដឹងពីសាលាឧទ្ធរណ៍មិនប្ដឹង ប្រឆាំងទៅនឹងសាលក្រមសាលាដំបូង ដើម្បីងាយស្រួលដល់សាលាឧទ្ធរណ៍លុបរឿងក្ដីនេះ ចេញពីបញ្ជីក្ដីសាលាឧទ្ធរណ៍៕