អំពើហិង្សានៅតែកើនឡើងនៅតំបន់បះបោរភាគខាងត្បូងថៃ
នៅតំបន់ភាគខាងត្បូងប្រទេសថៃ ការវាយប្រហារផ្សេងៗបានកើតមានឡើងតាំងពីថ្ងៃអង្គារម្សិលមិញ ពន្យារពេលរហូតដល់ថ្ងៃពុធនេះ ធ្វើអោយមានមនុស្ស៨នាក់ស្លាប់ តែក្នុងរយៈពេលមិនដល់២៤ម៉ោងផង។ អំពើហិង្សានៅតែបន្តកើនឡើង បើទោះជារដ្ឋាភិបាលថៃនិងក្រុមឧទ្ទាម បានព្រមព្រៀងគ្នាកាត់បន្ថយអំពើហិង្សា ក្នុងរយៈពេលប្រារព្ធបុណ្យសាសនារ៉ាម៉ាដង់ក៏ដោយ។
នៅ តំបន់បះបោរភាគខាងត្បូងប្រទេសថៃ បន្ទាប់ពីមានការស្ងប់ស្ងាត់អស់មួយរយៈ គិតចាប់ពីពេលប្រារព្ធពិធីបុណ្យសាសនាអ៊ីស្លាមរ៉ាម៉ាដង់មក ការវាយប្រហារជាច្រើនបានចាប់ផ្ទុះឡើងសារជាថ្មីឡើងវិញ កាលពីថ្ងៃអង្គារម្សិលមិញ។ នៅក្នុងខេត្ត Narathiwat ដែលជាខេត្តស្ថិតក្នុងការប្រកាសអាសន្ន ប៉ូលិសពីរនាក់បានត្រូវគេសម្លាប់ នៅក្នុងផ្សារមួយកន្លែង។ ការបាញ់ប្រហារមួយទៀត បានកើតឡើងនៅហាងតែមួយកន្លែង ក្នុងភូមិអ្នកកាន់សាសនាអ៊ីស្លាមមួយ បណ្តាលអោយប្តីប្រពន្ធមួយគូរ ស្លាប់នៅក្នុងរថយន្តរបស់ពួកគេ។
រដ្ឋាភិបាល ថៃនិងក្រុមឧទ្ទាម “រណសិរ្សបដិវត្តជាតិ” ទើបតែបានព្រមព្រៀងគ្នា នាពេលថ្មីៗនេះថា កាត់បន្ថយហិង្សាក្នុងពិធីបុណ្យសាសនារ៉ាម៉ាដង់នេះ ចាប់ពីថ្ងៃ១០កក្កដា រហូតដល់ថ្ងៃ១៨សីហា។ ។ ដើម្បីបន្ថយភាពតានតឹង ថៃបានកាត់បន្ថយការដាក់របាំងផ្លូវ និងដកទាហានខ្លួនចេញពីភូមិមួយចំនួន។ ប៉ុន្តែ អំពើហិង្សាថ្មីនេះ បានធ្វើអោយរលាយក្តីសង្ឃឹមក្នុងកិច្ចចរចារកសន្តិភាព កន្លងមក។ អ្នកវិភាគនានា សន្និដ្ឋានថា មេដឹកនាំក្រុមឧទ្ទាមប្រហែលជាមានការពិបាកក្នុងការគ្រប់គ្រង សកម្មជនខ្លួននៅក្នុងតំបន់បះបោរនេះ។
ទោះយ៉ាងនេះក្តី នៅថ្ងៃពុធនេះ លោក ផារ៉ាដន ប៉ាតាណាតាប៊ុត តំណាងភាគីថៃក្នុងការចរចាជាមួយក្រុមឧទ្ទាម បានលើកឡើងថា ការចរចាជាមួយក្រុមឧទ្ទាមនឹងនៅតែបន្តអនុវត្ត ហើយបានបន្ថែមទៀតថា អំពើហិង្សានេះមានចំនួនតិចជាងអំពើហិង្សាដែលបានកើតឡើង នាឧកាសបុណ្យរ៉ាម៉ាដង់ កាលពីឆ្នាំមុន។ យោងតាមភាគីថៃ នៅពេលដែលមានអំពើហិង្សាម្តងៗ ក្រុមឧទ្ទាមតែងតែប្រាប់ថា វាជាស្នាដៃរបស់ក្រុមបះបោរតូចៗមួយចំនួនដែលប្រឆាំងនឹងការ ពិភាក្សាស្វែងរកសន្តិភាពក្នុងតំបន់។
គួររំលឹកថា តំបន់ភាគខាងត្បូងថៃ កាលដើមឡើយ ស្ថិតក្នុងទឹកដីម៉ាឡេស៊ីរហូតដល់ដើមសតវត្សរទី២០ មុននឹងក្លាយជាកម្មសិទ្ធិប្រទេសថៃ។ ក្រុមបះបោរនៅទីនោះ បានព្យាយាមធ្វើសកម្មភាពប្រឆាំងការរើសអើងរបស់ប្រជាជនថៃមកលើ ជនជាតិ ភាគតិចម៉ាឡេ ដែលកាន់សាសនាអ៊ីស្លាម។ តាំងពីឆ្នាំ២០០៤មក ការបះបោរនានាក្នុងតំបន់នេះ បានសម្លាប់មនុស្សប្រមាណ ៥ ៧០០នាក់៕ដោយ ព្រំ សឿន សូលីណា (RFI)