អតីតមេដឹកនាំប៉ាគីស្ថានប្រឈមមុខនឹងទោសក្បត់ជាតិ
រដ្ឋាភិបាលថ្មីរបស់ប្រទេសប៉ា គីស្ថាននិយាយ ថាខ្លួនគ្រោងនឹងរៀបចំ ឲ្យមានការកាត់ទោសអតីតមេដឹកនាំរបបយោធាលោក Pervez Musharraf ពីអំពើក្បត់ជាតិ។
នាយក រដ្ឋមន្រ្តីប៉ាគីស្ថានទើបជាប់ឆ្នោត លោក Nawaz Sharif ថ្លែងថាលោក Pervez Musharraf ត្រូវតែឆ្លើយចំពោះមុខតុលាការជុំវិញបទឧក្រិដ្ឋទាំងឡាយដែលលោកបាន ប្រព្រឹត្តឡើងប្រឆាំងនឹងប្រទេសប៉ាគីស្ថាន។
បទចោទប្រកាន់ដែល លោក Musharraf កំពុងតែប្រឈមមុខនោះ បានគិតចាប់តាំងពីឆ្នាំ២០០៧ ជាពេលដែលលោកបានព្យួររដ្ឋធម្មនុញ្ញនិងអនុវត្តច្បាប់គ្រាអាសន្ន។
លោក Musharraf បានវិលត្រឡប់ចូលមាតុប្រទេសវិញកាលពីដើមឆ្នាំ២០១៣នេះ ក្រោយពេលនិរទេស ខ្លួនអស់រយៈពេល៤ឆ្នាំ។ លោកកំពុងតែតទល់នឹងការចោទប្រកាន់ផ្សេងទៀតជាច្រើនផងដែរទាក់ទង នឹងការកាន់អំណាចរបស់លោកចាប់តាំងតែពីការធ្វើរដ្ឋប្រហារយោធា ក្នុងឆ្នាំ១៩៩៩ ទម្លាក់លោក Nawaz Sharif ។
ច្បាប់នៅក្នុងប្រទេស ប៉ាគីស្ថានតម្រូវឲ្យជនជាប់ទោសពីបទក្បត់ជាតិទទួលទោសជាប់ពន្ធ នាគារអស់មួយជីវិត ឬទទួលការប្រហារជីវិត។
ប្រសិនបើការកាត់ ទោសនឹងប្រព្រឹត្តទៅមែននោះ នេះគឺជាករណីដំបូងបង្អស់នៅប្រទេសប៉ាគីស្ថានដែលមេដឹកនាំយោធាត្រូវ ទទួលការកាត់ទោសពីការបំពានរដ្ឋធម្មនុញ្ញរបស់ប្រទេសនេះ៕ (Radio Australia)