តួកគីចោទរុស្ស៊ីថាបានបញ្ជាយន្តហោះរំលោភដែនអាកាសរបស់ខ្លួនជាថ្មី
សារព័ត៌មាន Cambodia News/
តួកគី (០១ កុម្ភៈ ២០១៦) ៖ បើទោះបីទទួលបានការព្រមានពីតួកគីក៏ដោយយន្តហោះទម្លាក់គ្រាប់របស់ រុស្ស៊ីប្រភេទSu-34នៅថ្ងៃទី២៩មករា បានហោះរំលោភដែនអាកាសរបស់តួកគីជាថ្មីទៀត។ នេះបើតាមការអះអាងពីតួកគី។
បន្ទាប់ពី មានហេតុការណ៍នេះកើតឡើងភ្លាមៗ ទីក្រុងអង់ហ្គារ៉ាស់ បានកោះហៅឯកអគ្គរាជទូតរបស់រុស្ស៊ី ដើម្បីតវ៉ាផងដែរ។ ប៉ុន្តែលទ្ធផលនៃជំនួបប្តឹងតវ៉ារវាងភាគីទាំងពីរយ៉ាងណា មិនត្រូវបានរុស្ស៊ីបង្ហើបឲ្យដឹងនោះទេ។
អង្គការណាតូវិញ បានចេញមុខការពារតួកគី ដោយបានអំពាវនាវឲ្យរុស្ស៊ីធ្វើអ្វីមានការទទួលខុសត្រូវនិងគោរព ដែនអាកាសរបស់គេ ដោយរុស្ស៊ីត្រូវធានាថានឹងមិនបង្កើតឲ្យមានសកម្មភាពបែបនេះ ជាថ្មីម្តងទៀតជាដាច់ខាត។
ជាមួយគ្នានោះផងដែរ លោកប្រធានាធិបតីតួកគី នៅក្នុងដំណើរវិស្សមកាលទៅកាន់អាមេរិកឡាទីន បានឆ្លៀតព្រមានរុស្ស៊ីតាមរយៈការផ្តល់កិច្ចសម្ភាសន៍ដល់ អ្នកសារព័ត៌មាននៅទីក្រុងកាប៊ុលថា រុស្ស៊ីនឹងប្រឈមមុខនូវផលវិបាក ប្រសិនបើនៅតែមិនបោះបង់គំនិតរករឿងបង្កហេតុយ៉ាងដូច្នេះ៕
