លោក Barnaby Joyce ការពារសេចក្តីសម្រេចចិត្តរបស់រដ្ឋមន្រ្តីផែនការថវិកា
រដ្ឋមន្ត្រីក្រសួងកសិកម្ម អូស្រ្តាលី លោក Barnaby Joyce ចេញមុខការពារសេចក្តីសម្រេចចិត្តរបស់រដ្ឋមន្រ្តីផែនការថវិកាក្នុងការ ជំទាស់មិនឲ្យក្រុមហ៊ុនអាម៉េរិកឈ្មោះ Archer Daniels Midland ដែលហៅកាត់ថា ADM ដេញថ្លៃយកក្រុមហ៊ុន GrainCorp របស់អូស្ត្រាលី។
សហរដ្ឋអាម៉េរិកបានចេញសេចក្តីថ្លែងការណ៍មួយសម្តែងការខកចិត្តរបស់ខ្លួនលើការសម្រេចចិត្តនេះ។
សេចក្តី ថ្លែងការណ៍នេះឲ្យដឹងថា មកទល់បច្ចុប្បន្ននេះសហរដ្ឋអាម៉េរិកជាដៃគូវិនិយោគបោះទុនដោយផ្ទាល់ ធំជាងគេប្រចាំប្រទេសអូស្ត្រាលី ដែលមានទឹកប្រាក់វិនិយោគលើគំរោងផ្សេងៗសរុប ១៣២ ពាន់លានដុល្លារ។ សេចក្តីថ្លែងការណ៍នេះឲ្យដឹងទៀតថាសហរដ្ឋអាម៉េរិកមាន បំណងស្ថាបនាវិស័យជំនួញនិងវិនិយោគជាមួយអូស្រ្តាលី។
ប៉ុន្តែលោក Barnaby Joyce និយាយថាការសុំដេញថ្លៃយកមានបញ្ហាមួយចំនួន។ លោក Joyce គិតថាបញ្ហាមួយក្នុងចំណោមបញ្ហាទាំងឡាយនោះគឺថាថវិកាប្រមាណជា ៣០% នៃថវិការបស់ក្រុមហ៊ុន Archer Daniels Midland ជាថវិកាឧបត្ថម្ភធននានារបស់សហរដ្ឋអាម៉េរិក ដែលមានន័យថាបើកាលណាក្រុមហ៊ុន ADM ជាអ្នកគ្រប់គ្រង ក្រុមហ៊ុន GrainCorp នោះនឹងមានកត្តាថវិកាច្រើនផ្នែកជះឥទ្ធិពលមកលើដំណើរការរបស់ ក្រុមហ៊ុន GrainCorp ។ កត្តានេះនឹងនាំឲ្យគោលនយោបាយកសិកម្មផ្សេងៗរបស់អាម៉េរិកមានឥទ្ធិពលមក លើដំណើរការរបស់ក្រុមហ៊ុន GrainCorp ដែរ ដែលកត្តានេះមិនហុចផល ប្រយោជន៍ច្រើនដល់ប្រទេសអូស្រ្តាលីនោះទេ ៕ (Radio Australia)