កម្ពុជា រក្សាជំហរដោះស្រាយ បញ្ហាប្រាសាទព្រះវិហារ ដោយសន្តិវិធី
Cambodia News
ភ្នំពេញ៖ កាលពីថ្ងៃទី១៧ មិថុនា ប្រទេសកម្ពុជាបានប្រាប់ឲ្យដឹងថា រហូតមកដល់ពេលនេះ ខ្លួននៅតែរក្សាជំហរដដែល ចំពោះការដោះស្រាយសំណុំរឿងប្រាសាទព្រះវិហារជាមួយថៃ នោះគឺការដោះស្រាយដោយសន្តិវិធី និង មិត្តភាព។
លោក ហោ ណាំហុង រដ្ឋមន្ត្រីក្រសួងការបរទេស បានថ្លែងបែបនេះ បន្ទាប់ពីមានការចោទសួរពីសំណាក់លោក ស្រី អ៊ីរីណា បូកាវ៉ា អគ្គនាយកអង្គការយូណេស្កូកាលពីម្សិលមិញ ដែលថា កម្ពុជានឹងដោះស្រាយដូចម្ដេចចំពោះជម្លោះប្រាសាទព្រះវិហារជាមួយថៃនោះ ?
គួរបញ្ជាក់ថា ប្រាសាទព្រះវិហារបានក្លាយជាកម្មវត្ថុនៃជម្លោះសារជាថ្មី រវាងកម្ពុជា និងថៃ បន្ទាប់ពីកម្ពុជាបានចុះឈ្មោះប្រាសាទដែលសាងសង់នៅសវត្សរ៏ទី៩នេះ របស់ខ្លួនចូលទៅក្នុងបញ្ជីសម្បតិ្តបេតិកភ័ណ្ឌ ពិភពលោក កាលពីអំឡុងឆ្នាំ២០០៨ ដែលរហូតបង្កឲ្យមានការផ្ទុះអាវុធដាក់គ្នា ។
ក្រោយមកកម្ពុជាបានបញ្ជូនសាលក្រមឆ្នាំ១៩៦២ នៃ សំណុំរឿងនេះ ទៅឲ្យតុលាការយុត្តិធម៌អន្តរជាតិ (ICJ) បកស្រាយ ដែលគេជឿថា សាលក្រមថ្មីដែលប្រកបដោយយុត្តិធម៌មួយ នឹង ត្រូវគេប្រកាសឲ្យដឹង នាចុងឆ្នាំ២០១៣ នេះហើយ ៕
