គ.ជ.ប បង្ហាញលទ្ធផល នៃការដោះស្រាយបណ្តឹង តវ៉ាទៅនឹងលទ្ធផលបោះឆ្នោតបណ្តោះអាសន្ន
ភ្នំពេញ៖ តាមរបាយការណ៍ របស់ក្រុមផ្ទៀងផ្ទាត់ស្តីពីការផ្ទៀងផ្ទាត់លទ្ធផលនៃការបោះឆ្នោតនៅ គ.ជ.ប ចុះថ្ងៃទី១៥ និង ថ្ងៃទី១៦ ខែសីហា ឆ្នាំ២០១៣ បង្ហាញថា លទ្ធផលនៃការពិនិត្យផ្ទៀងផ្ទាត់តាមការិ យា ល័យបោះឆ្នោតពាក់ព័ន្ធ នៃមណ្ឌលខេត្តក្រចេះ ខេត្តបាត់ដំបង ខេត្តសៀមរាប និងខេត្តកណ្តាល គឺមានភាពត្រឹមត្រូវទាំងស្រុង។
សេចក្តីប្រកាស បានបញ្ជាក់ផងដែរថា គិតត្រឹមល្ងាចថ្ងៃទី១៦ ខែសីហា ឆ្នាំ២០១៣ គ.ជ.ប បានដោះស្រាយបណ្តឹងទាំង១៧ រួចរាល់ហើយ និងបានប្រគល់លិខិតជូនដំណឹង ឬទម្រង់សេចក្តី សម្រេចជូនដើមបណ្តឹងហើយដែរ។
គណបក្សនយោបាយ ជាដើមបណ្តឹងមានសិទ្ធិប្តឹងតវ៉ាជាលាយលក្ខណ៍អក្សរ ទៅក្រុមប្រឹក្សាធម្មនុញ្ញក្នុងរយៈពេល ៧២ម៉ោង យ៉ាងយូរ បន្ទាប់ពីបានទទួលលិខិតជូនដំណឹង ឬទម្រង់សេចក្តីសម្រេចបដិសេធទៅតាមនីតិវិធីរបស់ ក្រុមប្រឹក្សាធម្មនុញ្ញ។
ក្រុមប្រឹក្សាធម្មនុញ្ញ នឹងសម្រេចសេចក្តីចុងក្រោយផ្អែកតាមនីតិវិធីរបស់ ក្រុមប្រឹក្សាធម្មនុញ្ញ លើពាក្យបណ្តឹងតវ៉ាក្នុងរយៈពេលពី១០ ទៅ២០ថ្ងៃយ៉ាងយូរបន្ទាប់ពីថ្ងៃ បានទទួលពាក្យបណ្តឹង។ ផ្អែកតាម ច.ប.ត.រ និងប្រតិទិននៃការបោះឆ្នោតជ្រើសតាំងតំណាងរាស្ត្រនីតិកាលទី៥ គ.ជ.ប នឹងប្រកាសផ្សាយលទ្ធផលផ្លូវការនៃការបោះឆ្នោត ការបែងចែកអាសនៈ និងការកំណត់បេក្ខជនជាប់ឆ្នោត បន្ទាប់ពីក្រុមប្រឹក្សាធម្មនុញ្ញ ដោះស្រាយបណ្តឹងចប់ជាស្ថាពរ៕ Cambodia News