កែវ ពេជ្រពិសី ទទួលស្គាល់ចំណងស្នេហ៍ថ្មី
ភ្នំពេញ៖ ជាង១ឆ្នាំ មកតារាសម្តែង កែវ ពេជ្រពិសី ព្យាយាមវេចខ្ចប់ ព័ត៌មានស្នេហ៍មន្ត្រីយោធា នៅព្រំដែន។ ប៉ុន្តែ ថ្មីៗនេះ ពិសី បានព្រមទទួល ស្គាល់ដំណឹងស្នេហ៍ថ្មីនេះ តែថាស្ថិតក្នុងដំណាក់កាលមើលចិត្តគ្នា នៅឡើយ។
ទីបំផុត តារាសម្តែងកែវ ពេជ្រពិសី ព្រមទទួលស្គាល់ចំណងស្នេហ៍ដែលលេចធ្លាយ នោះថា ជាការពិតហើយ ទោះបីនាងបញ្ជាក់ថា ត្រឹមជាដំណាក់កាលសម្លឹងមើលគ្នាទៅវិញទៅមក ក៏ដោយ ក៏ជាសញ្ញាវិជ្ជមានមួយបង្ហាញថា ដើមស្នេហ៍មួយនេះ អាចនឹងដុះមែកធាងរីកលូតលាស់ នាពេលអនាគតដ៏ខ្លីមិនខាន។
ដំណឹងស្នេហ៍ថ្មីនេះ បានបែកធ្លាយកាលពីអំឡុងពេលដែលកែវ ពេជ្រពិសី ទៅថត ភាពយន្តភាគ ឱ្យទូរទស្សន៍បាយ័ន រឿង “ពន្លកស្នេហ៍ក្បែរជាយដែន” នាចុងឆ្នាំ២០១១ តែបានស្ងប់រលត់ទៅវិញ ក្រោយពេលពិសី ចេញមុខបដិសេធ។ តារាសម្តែងកែវ ពេជ្រពិសី បានជំពប់នឹងរឿងដដែលនេះម្តងទៀត កាលពីដើមឆ្នាំ ២០១៣ ក្រោយពីនាងវិលត្រឡប់ទៅថតនៅតំបន់នោះសាជាថ្មី ជាមួយក្រុមការងារទូរទស្សន៍បាយ័ន ហើយត្រូវឈប់សម្រាកជាច្រើន សប្តាហ៍នៅទីនោះ ដើម្បីថតរឿងភាគថ្មី ស្របពេលដែល មហាជនបានឃើញនាងបណ្តើរមន្ត្រីយោធាម្នាក់ ចូលទៅក្នុងទឹកដីថៃ និងមានភាពស្និទ្ធស្នាលដូចគូស្នេហ៍។
អ្នករួមដំណើរជាមួយពិសី ទៅថតភាពយន្ត ម្នាក់ សុំមិនបញ្ចេញឈ្មោះ និងជាបុគ្គលិកបម្រើការងារនៅស្ថានីយទូរទស្សន៍ បាយ័ន បានឱ្យដឹងថា មន្ត្រីយោធារូបនោះ ជាបុរសពោះម៉ាយ និង មានវ័យច្រើនជាងពិសី ដល់ទៅ២០ឆ្នាំឯណោះ ប៉ុន្តែ បុរសនោះ ពេញចិត្តតារាសម្តែងកែវ ពេជ្រពិសី ខ្លាំងណាស់ រហូតទិញរបស់ មានតម្លៃជាច្រើនឱ្យនាង ក្នុងពេលដើរកម្សាន្តនៅប្រទេសថៃ នោះ ទៀតផង។
ពិសី ប្រាប់ថា “ពួកខ្ញុំនៅសម្លឹងមើលគ្នាឱ្យច្បាស់សិន ព្រោះកន្លងមក ធ្លាប់មានរបួសបេះដូងម្តងហើយ តាមពិតទៅ ខ្ញុំមិនចង់លាក់បាំងទស្សនិកជនទេ តែ បើវាមិនទាន់ច្បាស់លាស់ផង ឱ្យខ្ញុំប្រាប់យ៉ាងម៉េចទៅ? ខ្ញុំពិតជាមិនចង់ឱ្យមានព័ត៌មាន ដែលមិនទាន់ពិត កើតឡើងទេ ទើបចេះតែបដិ- សេធទៅ ព្រោះយើងមិនអាចដឹងរឿងកើតឡើង ពេលខាងមុខបានឡើយ តែបើក្លាយជាប្តីប្រពន្ធស្របច្បាប់ ទោះមានរឿងអី ក៏វា ធម្មតាដែរ”។
ការទម្លាយចេញរបស់ពិសី នៅពេលនេះ ច្បាស់ណាស់ថា ស្នេហារបស់នាងកំពុង លេចចេញសញ្ញាល្អ គ្រាន់តែនាងមិនហ៊ាន បញ្ជាក់ឱ្យច្បាស់ ព្រោះមិនទាន់ចូលរោងការ នៅឡើយ ប៉ុន្តែ ទស្សនិកជនអាចទស្សន៍ទាយ បានថា កែវ ពេជ្រពិសី កំពុងមានសង្ឃឹមចំពោះ ស្នេហ៍ថ្មីនេះ ទើបនាងញញឹមបិទមាត់មិនជិត និង មានអារម្មណ៍ល្អឡើងវិញ ក្រោយពីទទួលរងបរាជ័យ ស្នេហាដំបូងជាមួយស្វាមី កាលពីអំឡុងឆ្នាំ២០១០ កន្លងទៅនេះ។
ពិសី ប្រាប់ថា “ខ្ញុំមិនធានាថា បុរសនោះ អាចជាស្វាមីខ្ញុំឬក៏អត់នោះទេ ឯរឿងប្រាប់អត្តសញ្ញាណបុរសរូបនោះ ក៏ខ្ញុំមិនអាចប្រាប់ បានដែរ ដរាបណាពួកយើងមិនទាន់បានចូល ក្រាបសំពះផ្ទឹមជាមួយគ្នាទេនោះ។ ប៉ុន្តែ ខ្ញុំ ទទួលស្គាល់ថា ពួកយើងកំពុងមានទំនាក់ទំនងល្អ ជាមួយគ្នាមែន ឯរឿងរៀបការពេលណា ពេលហ្នឹង ទៅ បើជាគូ វាមិនបែកដូចមុន ទេ”៕ ស.រ/Cambodia News
