បើដករមណីយដ្ឋានបូកគោពីក្រុមហ៊ុនឯកជន កម្ពុជានៅតែកម្ពុជា
Column
ដោយ ឆាយ សុផល
រឿងរ៉ាវទាក់ទិននឹងរមណីយដ្ឋានបូកគោនាពេលថ្មីៗនេះ ខ្ញុំមិនបាច់រាយរាប់នោះទេ គឺពលរដ្ឋខ្មែរនិងបរទេសជាច្រើនបានដឹងរួចមកហើយ ប៉ុន្តែអ្វីដែលខ្ញុំចង់ធ្វើអត្ថាធិប្បាយក្នុងអត្ថបទ Column នេះគឺ៖
ទាញយកបទពិសោធន៍នៃការគ្រប់គ្រងប្រាក់ចំណូលចូលជាតិនៅតំបន់ប្រាសាទអង្គររវាងក្រុមហ៊ុនឯកជន និងរដ្ឋ នោះរាជរដ្ឋាភិបាលកម្ពុជាអាចពិចារណាទាញយកតំបន់ ប្រវត្តិសាស្រ្តបូកគោនៃយើងចេញពីក្រុមហ៊ុនឯកជនមកវិញបានដោយមិនលំបាក។
ជាការពិតណាស់ដែលថា នោះអាចជាការលំបាកខ្លះសម្រាប់រាជរដ្ឋាភិបាលក្នុងការដកយកមកវិញ នេះក៏ដោយសារតែគោលនយោបាយទាក់ទាញវិនិយោគរបស់ខ្លួន ប៉ុន្តែបើក្រុមហ៊ុនឯកជនមួយបានបង្កបញ្ហាចលាចលផ្នែកទស្សនៈផ្អើលពេញផ្ទៃនគរ ហើយធ្វើឲ្យរាជរដ្ឋាភិបាល និងអាជ្ញាធរមូលដ្ឋានវ៉ល់ដោយសារតែទស្សនៈនេះ នោះការដកយកការគ្រប់គ្រងមកវិញ ពិតជាគ្មានការជំទាស់ពីមហាជនឡើយ។ ម្យ៉ាងទៀត នៅលើតំបន់កំពូលភ្នំបូកគោនេះក៏ធ្លាប់មានបញ្ហាជាបន្តបន្ទាប់ដែលទាំងសារព័ត៌មាន និងអ្នកប្រើបណ្តាញសង្គមហ្វេប៊ុកបានផ្សាយពីរឿងការប្រារព្វពិធីសាសនារបស់ជនជាតិវៀតណាមផងដែរ បើទោះជាគោលនយោបាយរបស់រាជរដ្ឋាភិបាលមិនប្រកាន់ពូជសាសន៍ និងសាសនាក៏ដោយ។
មន្រ្តីរាជការរបស់យើងនាពេលបច្ចុប្បន្នពិតជាមានសមត្ថភាពគ្រប់គ្រាន់ក្នុងការគ្រប់គ្រង ហើយដោយមានការតាមដានពីអង្គភាពប្រឆាំងអំពើពុករលួយទៀត នោះមន្រ្តីរាជការរបស់យើងពិតជាមានការប្រុងប្រយ័ត្នខ្ពស់ក្នុងការទទួលខុសត្រូវចំពោះមុខងាររបស់ខ្លួន ក្នុងក្របខ័ណ្ឌកំណែទម្រង់របស់រាជរដ្ឋាភិបាល។
ចំណែកឯក្រុមហ៊ុនឯកជនដែលបានចំណាយថវិកាជួសជុល និងកែលម្អផ្លូវ ព្រមទាំងបរិវេណខ្លះចាប់ពីជើងភ្នំរហូតដល់កំពូលភ្នំ រាជរដ្ឋាភិបាលអាចសងសំណងវិញតាមដំណាក់កាល ទៅតាមលទ្ធភាពដែលខ្លួនអាចធ្វើបាន ខណៈដែលសណ្ឋាគារ និងកាស៊ីណូរបស់ក្រុមហ៊ុនឯកជននោះ ទុកឲ្យគេគ្រប់គ្រងដោយខ្លួនឯងជាធម្មតា មិនចាំបាច់ដកមកវិញនោះទេ។
ពិតជាមិនអាចប្រកែកបានទេដែលថា ការដកតំបន់ប្រវត្តិសាស្រ្តបូកគោចេញពីក្រុមហ៊ុនឯកជនគឺរាជរដ្ឋាភិបាលអាចខាតបង់ខ្លះលើគោលនយោបាយទាក់ទាញវិនិយោគរបស់ខ្លួន ប៉ុន្តែវាក៏ហេតុផលមួយ ក៏ដូចជាការព្រមានដល់ក្រុមហ៊ុនឯកជនទាំងឡាយដែលទទួលបានការអនុញ្ញាតិពីរាជរដ្ឋាភិបាលនិងកំពុងធ្វើធុរកិច្ចនៅកម្ពុជា បែរជាធ្វើព្យុះភ្លៀងគ្រប់រដូវកាលនាំឲ្យពលរដ្ឋខ្មែរក្តៅក្រហល់ក្រហាយ តែបែរជាមួម៉ៅនឹងរាជរដ្ឋាភិបាល ដូចពាក្យខ្មែរពោលថា “ខឹងគោ វ៉ៃរទេះ”។
សរុបមកវិញ បើអាចដកបាន ក៏ដកទៅ ទុកនាំឲ្យសៅហ្មងធ្វើអ្វី! កន្លងមក តំបន់ប្រាសាទអង្គរ ផ្លូវជាតិលេខ៤ ផ្លូវ២០០៤ និងផ្លូវវេងស្រេង ព្រមទាំងតំបន់ខ្លះទៀត រាជរដ្ឋាភិបាលអាចដកចេញបានពីក្រុមហ៊ុនឯកជន ហេតុនេះ ការដកតំបន់ប្រវត្តិសាស្រ្តបូកគោចេញមួយទៀតពីក្រុមហ៊ុនដែលបង្កបញ្ហា ក៏មហាជនមិនអន់ចិត្តដែរ ហើយរឹតតែសាទរចំពោះសុភវិនិច្ឆ័យរបស់ថ្នាក់ដឹកនាំនៃរាជរដ្ឋាភិបាលថែមទៀត។
សម្រាប់ខ្ញុំ ទោះជាដកឬមិនដក ខ្ញុំនៅតែមានជំនឿលើថ្នាក់ដឹកនាំកំពូលនៃរាជរដ្ឋាភិបាលចំពោះការសម្រេចចិត្តមួយដ៏ត្រឹមត្រូវ ដោយទទួលផលទាំងសងខាង ឬហៅថា “យុទ្ធសាស្រ្តឈ្នះឈ្នះ” ដែលរាជរដ្ឋាភិបាលធ្លាប់ធ្វើកន្លងមក៕