បុរស ៣នាក់ជិះម៉ូតូឌុបគ្នាឆ្លងថ្នល់ ត្រូវរថយន្តបុកស្លាប់ម្នាក់ របួសធ្ងន់២នាក់
Cambodia News
ភ្នំពេញ៖ កាលពីម៉ោង០និង៣០នាទី រំលងអធ្រាត្រឈានចូលថ្ងៃទី២៧ ខែមីនា ឆ្នាំ២០១៣ បុរស៣នាក់ជិះម៉ូតូឌុបគ្នាឆ្លងផ្លូវ ត្រូវរថយន្តបុកស្លាប់ម្នាក់នៅនឹងកន្លែង ឯ២នាក់ទៀតរងរបួសធ្ងន់ នៅលើកំណាត់ផ្លូវជាតិលេខ២ ក្នុងភូមិព្រែកតាគង់ សង្កាត់ចាក់អង្រែលើ ខណ្ឌមានជ័យ។
ប្រភពព័ត៌មានពីសមត្ថកិច្ចបានឲ្យដឹងថា មុនពេលកើតហេតុ រថយន្តឡិចស៊ីស ពណ៌ស្ករ ពាក់ស្លាកលេខ ភ្នំពេញ 2P-9539 បើកបរតាមបណ្ដោយផ្លូវជាតិលេខ២ ទិសដៅពីជើងទៅត្បូង ចំណែកម៉ូតូឃ្លីក ពណ៌ទឹកក្រូចលាយខ្មៅ ជិះគ្នា៣នាក់ ចេញពីផ្លូវបេតុង ពីលិចទៅកើត ឆ្លងកាត់ផ្លូវត្រូវរថយន្តបុកផ្លោងអូសជិត១០០ម៉ែត្រ នាំយកអ្នកជិះម៉ូតូ២នាក់ទៅជាមួយ ចំណែកម្នាក់ទៀតខ្ទាតទៅចិញ្ចើមផ្លូវខាងស្តាំ បណ្តាលឲ្យបុរសម្នាក់ស្លាប់ភ្លាមៗ ឯ២នាក់ទៀតរបួសធ្ងន់។
ក្នុងចំណោមជនរងគ្រោះ៣នាក់ ស្គាល់អត្តសញ្ញាណម្នាក់ ឈ្មោះ រស់ ចំរើន ភេទប្រុស ជាមេកាថ្នាំបៀក នៅបុរីប៉េងហួត រងរបួសធ្ងន់ បញ្ជូនតាមរថយន្តសង្ក្រោះទៅព្យាបាលនៅមន្ទីរពេទ្យកាល់ម៉ែត។
ក្រោយពីបុកភ្លាម រថយន្តបង្កបានបើករត់គេចបាត់ តែជ្រុះស្លាកលេខនៅកន្លែងកើតហេតុ។ ចំណែក សពជនរងគ្រោះសមត្ថកិច្ចដឹកយកទៅតម្កល់ទុកនៅវត្តទឹកថ្លា រង់ចាំសាច់ញាតិមកទទួលយកទៅធ្វើបុណ្យតាមប្រពៃ៕ ហេង នាង
