គ្រឿងញៀនកំពុងវាយលុកនិងពង្វក់យុវជននៅតាមជនបទគួរឲ្យព្រួយបារម្ភ
នៅក្នុងឆ្នាំ២០១២ នេះគ្រឿងញៀនហាក់មានការកក្រើកឡើងវិញ ដោយបានពង្វក់ក្រុមយុវជននៅតាមជនបទមួយចំនួនស្ទើរតែក្លាយទៅជា អ្នកជួញដូរ និងប្រើប្រាស់ផងដែរ។ បច្ចុប្បន្ន ក្រុមយុវជននៅតាមមូលដ្ឋាន ហាក់មានការប្រើប្រាស់នៅសារជាតិញៀនមួយចំនួនធំ ដែលធ្វើឲ្យម្ដាយឪពុកមានការព្រួយបារម្ភ ដោយសារពួកគេបានបំផ្លិចបំផ្លាញគ្រួសារ ក៏ដូចជាសង្គមជាតិផងដែរ។
ម្យ៉ាងវិញទៀតនៅពេលសមត្ថកិច្ចចាប់ ឬឃាត់ពួកគេបាន គឺសមត្ថកិច្ចទាំងអស់ស្ទើរតែរកឯកសារដាក់បន្ទុក ដើម្បីឲ្យពួកគេមានទោសគ្មានផង ទើបពេលខ្លះសមត្ថកិច្ចបានបង្ខំចិត្តដោះលែងឲ្យគេទៅផ្ទះវិញ។ កត្តាបែបនេះ ធ្វើឲ្យពួកគេបានរឹតតែប្រើប្រាស់គ្រឿងញៀនកាន់តែខ្លាំងឡើងរហូតហ៊ាន ប្រព្រឹត្តិបទល្មើសផ្សេងៗបន្តទៀត ដោយពួកគេគិតថា សមត្ថកិច្ចមិនអាចធ្វើអ្វីកើតនោះទេ។
មកដល់ពេលនេះ សមត្ថកិច្ចបានដឹងចំនួនអំពីការប្រើប្រាស់របស់យុវជនមូលដ្ឋាន ប៉ុន្តែសមត្ថកិច្ចមិនងាយតាមដានចាប់ពួកអ្នកប្រើប្រាស់ទាំងនោះទេ ពោលគឺពួកប្រើប្រាស់មានការប្រុងប្រយ័ត្នខ្ពស់ តែក៏មិនអាថ៌កំបាំងខ្លាំងពេកដែរ។ មួយវិញទៀតរាល់ការបង្ក្រាប ឬចាប់បានក្មេងជួញដូរប្រើប្រាស់គ្រឿងញៀន សមត្ថកិច្ចហាក់មិនបានបង្ហាញមុខពួកក្មេងទាំងនោះ ដល់អ្នកសារព័ត៌មាន ដើម្បីចុះផ្សាយនោះទេ ដោយមានលេសថា ទុកស្រាវជ្រាវ ឬវែកមុខរកមេខ្លោងរបស់វាសិន។
ប៉ុន្តែ មានមហាជនខ្លះបាននិយាយថា ពួកក្មេងទាំងនោះ គេមិនដែលឃើញជាប់ពន្ធនាគារបានយូរនោះទេ ភាគច្រើនជាប់បានតែ ១ ឬ ២ យប់ ប៉ុណ្ណោះ៕
