ស្លាប់ ៦នាក់ ក្នុងហេតុការណ៍ឆេះមន្ទីរពេទ្យធំមួយនៅប្រទេសម៉ាឡេស៊ី
សារព័ត៌មាន Cambodia News/
ម៉ាឡេស៊ី (២៥ តុលា ២០១៦) ៖ អ្នកជំងឺយ៉ាងហោចណាស់៦នាក់បានស្លាប់បាត់បង់ជីវិត ខណៈដែលអ្នកជំងឺរាប់រយនាក់ផ្សេងទៀតត្រូវបង្ខំជម្លៀសចេញមកកន្លែងសុវត្ថិភាពដោយសារអគ្គិភ័យបានឆាប់ឆេះមន្ទីរពេទ្យធំមួយនៅរដ្ឋJohor Baru នៃប្រទេសម៉ាឡេស៊ី។
នេះបើតាមទីភ្នាក់ងារព័ត៌មានចិនស៊ិនហួរ នារសៀលថ្ងៃអង្គារ ទី២៥ ខែតុលា ឆ្នាំ២០១៦នេះ។ សមត្ថកិច្ចម៉ាឡេស៊ីបាននិយាយថា អគ្គិភ័យបានឆាបឆេះនៅអគារគាំពារអ្នកជំងឺជាន់ទីពីររបស់មន្ទីរពេទ្យ Sultanah Aminah នៅព្រឹកថ្ងៃអង្គារនេះតែម្តង ។
សមត្ថកិច្ចបញ្ជាក់ថា បន្ទាប់ពីបានពន្លត់ភ្លើងរួចរាល់ ប៉ូលិសបានចូលទៅក្នុងអគារដើម្បីនាំយកសាកសពអ្នកជំងឺចំនួន០៦នាក់ ដែលពួកគេទំនងជាទទួលរងការ ឈ្លក់ផ្សែង និងកម្តៅរហូតដល់បាត់បង់ជីវិត៕
