បំផ្ទុះគ្រាប់បែកអត្តឃាតនៅក្នុងរដ្ឋធានីបាដាដសម្លាប់មនុស្ស៣៥នាក់
សារព័ត៌មាន Cambodia News/
អ៊ីរ៉ាក់ (១៦ មករា ២០១៨) ៖ ក្រសួងមហាផ្ទៃអ៊ីរ៉ាក់បាននិយាយថា ការបំផ្ទុះគ្រាប់បែកអត្តឃាតចំនួន២នៅក្នុងតំបន់ភាគខាងកណ្ដាលនៃរដ្ឋធានីបាដាដ ប្រទេសអ៊ីរ៉ាក់ បានសម្លាប់មនុស្សយ៉ាងតិច៣៥នាក់ និងបានធ្វើអោយមនុស្សជាង៦០នាក់ផ្សេងទៀតរងរបួសកាលពីថ្ងៃចន្ទម្សិលមិញនេះ។
យោងតាមអាជ្ញាធររបស់អ៊ីរ៉ាក់បាននិយាយថា ការវាយប្រហារនេះបានកើតឡើងនៅឯទីលានមួយកន្លែងក្នុងតំបន់ភាគកណ្ដាលនៃរដ្ឋធានីបាដាដ ហើយត្រូវបានធ្វើឡើងដោយអ្នកបំផ្ទុះគ្រាប់បែកអត្តឃាតចំនួន២នាក់។
តំបន់ដែលនៅជុំវិញទីលាននោះជាទូទៅមានមនុស្សប្រមូលផ្ដុំគ្នាច្រើនជាពិសេសក្រុមកម្មករដែលកំពុងស្វែងរកការងារធ្វើ។ ប៉ុន្តែសេចក្ដីថ្លែងការណ៍របស់ក្រសួងមហាផ្ទៃអ៊ីរ៉ាក់បាននិយាយថា តួលេខនៃអ្នកបាត់បង់ជីវិត និងអ្នករងរបួសអាចនឹងកើនឡើងថែមទៀតដោយសារសាកសពបន្ថែមទៀតត្រូវបានយកចេញពីទីតាំងកើតហេតុ។
ទោះបីយ៉ាងណាភ្លាមៗនេះមិនទាន់មានក្រុមណាមួយចេញមកអះអាងទទួលខុសត្រូវចំពោះការវាយប្រហារនេះនៅឡើយទេ ប៉ុន្តែការវាយប្រហារបែបនេះជាច្រើនលើកកន្លងមកធ្លាប់ត្រូវបានក្រុមរដ្ឋអ៊ីស្លាមអះអាងទទួលខុសត្រូវថាជាស្នាដៃរបស់ពួកគេ៕
