មន្ត្រីប៉េអឹមម្នាក់បាញ់សម្លាប់ខ្លួនឯង និងសង្សារក្នុងផ្ទះសំណាក់
សារព័ត៌មាន Cambodia News/
ភ្នំពេញ (២៣ មិថុនា ២០១៤) ៖ កាលពីវេលាម៉ោង១និង២០នាទីរំលងអធ្រាត្រ ឈានចូលថ្ងៃទី២៣ខែមិថុនា មន្ត្រីប៉េអឹមម្នាក់ ប្រចាំការនៅប៉ុស្តិ៍ព្រែកចាក ខេត្តកំពត បានដកកាំភ្លើងបាញ់សម្លាប់ខ្លួនឯង និងសង្សារនៅក្នុងផ្ទះសំណាក់ ហេងមហាសាល ស្ថិតក្នុងភូមិគៀនឃ្លាំង សង្កាត់ព្រែកលៀប ខណ្ឌជ្រោយចង្វា រាជធានីភ្នំពេញ តែសំណាងល្អនារីជាសង្សាររួចផុតពីគ្រោះថ្នាក់។
មន្ត្រីប៉េអឹមម្នាក់នោះ ឈ្មោះហែម ភាព ភេទប្រុស អាយុ៣៥ឆ្នាំ មានឋានន្តរស័ក្តិអនុសេនីយ៍ឯក និងជាអនុប្រធានប៉ុស្តិ៍ព្រែកចាក នៅខេត្តកំពត ចំណែកនារីជាសង្សារមិនមានរបួសឈ្មោះ ថោង ថាវី អាយុ២៩ឆ្នាំ ជាអាជីវករលក់ហូលផាមួងនៅផ្សារអូរប្ញស្សី។
ប្រភពព័ត៌មានឱ្យដឹងថា មុនពេលកើតហេតុ ជនរងគ្រោះបានជិះរថយន្តម៉ាកកូរ៉ូឡា ពណ៌ស ពាក់ស្លាកលេខភ្នំពេញ 2Y-5408 ទៅដឹកនារីសង្សារដើរលេងនិងផឹកស៊ី រួចក៏គ្នាចូលដេកក្នុងសំណាក់ហេងមហាសាល។
ប្រភពបន្តទៀតថា ពេលចូលដេកនោះ ជនរងគ្រោះបាននិយាយថា មានបញ្ហានៅកន្លែងធ្វើការ និងគ្រួសារ រួចក៏បានយកកាំភ្លើងម៉ាករ៉ូឡូ មកបង្វិលដោះគ្រាប់លេង ដោយដៃម្ខាងកាន់កាំភ្លើងភ្ជង់ចំសៀតផ្កាខ្លួនឯង និងដៃម្ខាងទៀតកៀកក នារីជាសង្សារ បំណងបាញ់ស្លាប់ទាំងពីរនាក់ ខណៈនោះនារីជាសង្សារបានរត់ចេញទាន់ ទើបបណ្តាលឱ្យមន្ត្រីខាងលើបាញ់ស្លាប់ខ្លួនឯងតែម្តង៕
