កែវ ពេជ្រពិសី បញ្ជាក់ពីការបិទហាង
សារព័ត៌មាន Cambodia News /
ភ្នំពេញ(២៧ កុម្ភៈ ២០១៤)៖ មានការ ចោទសួរយ៉ាងច្រើន មានទាំងអ្នកក្នុងសិល្បៈ និងក្រៅសិល្បៈ នៅពេលហាងសម្អាងការរបស់ តារាសម្តែង អ្នកនាង កែវ ពេជ្រពិសី នៅតាមបណ្ដោយផ្លូវសហព័ន្ធរុស្ស៊ី នៅជិតស្ដុបពន្ធដារទួលគោក ស្រាប់តែត្រូវបិទទ្វារទម្លាក់ស្លាក ដោយភាពតក់ក្រហល់ កាលពីប៉ុន្មានថ្ងៃមុន ដែលមុននេះក៏ល្បីថា នាងទទួលបានការកក់ និងប្រកាសពង្រីកទីតាំងនេះឲ្យធំទូលាយនោះផង។
ប៉ុន្តែប្រភពពីអ្នកជិតខាងទីតាំងសម្អាងការនោះ បានខ្សឹបប្រាប់ថា កែវ ពេជ្រពិសី បិទហាងនោះចោលហើយ បន្ទាប់ពីម្ចាស់ទីតាំងនោះ បានកំណត់តម្លៃឡើងថ្លៃ ដោយទំនងមិនអាចស្វែងរកការចរចាកំណត់តម្លៃត្រូវគ្នាបានដើម្បី ជួលបន្ត។
ជុំវិញ ការបិទទ្វារហាងសម្អាងការនៅចំផ្លូវធំ និងដំណើរការលើកស្លាកថ្មីនៅផ្លូវតូចម្តុំផ្សារទួលគោកនោះ ម្ចាស់ហាងសម្អាងការរូបស្រស់នាង កែវ ពេជ្រពិសី បានបដិសេធចំពោះពាក្យដែលគេលើកឡើងថា នាងក្ស័យធន។ នាងអះអាងខ្លីថា៖«មិនមានឡើយការក្ស័យធន សម្រាប់របរសម្អាងការរបស់នាង» ។
តារាដែលឡើងឈ្មោះជាថៅកែ សម្អាងការលេចធ្លោក្នុងឆាកសិល្បៈ ក្រោយរងគ្រោះអាពាហ៍ពិពាហ៍ឆ្លងទ្វីប រូបនេះបានប្រាប់ថា មានមូលហេតុធំពីរដែលត្រូវតែឲ្យនាងបិទហាងធំ ផ្លូវធំ ទៅបើកដំណើរហាងនៅផ្លូវក្នុង ដែលមិនសូវមានមនុស្សឆ្លងកាត់ច្រើន។ ពេជ្រពិសី បញ្ជាក់ថា៖«មូលហេតុទី១ ដែលចាំបាច់ត្រូវតែបិទទ្វារ និងទម្លាក់ស្លាកហាងនៅផ្លូវសហព័ន្ធរុស្ស៊ីនោះ គឺបញ្ហាឡើងថ្លៃផ្ទះ ចំណែកឯបញ្ហាទី២ មកពីខ្ញុំមិនមានពេលគ្រប់គ្រាន់មើលហាង២ព្រមគ្នា គឺជាហេតុផលដែលនាងសម្រេចបិទហាងចោលមួយ»។
កែវ ពិសី ក្នុងពេលដំណើរការហាងទី២ ធ្លាប់និយាយថា ហាងធំនៅផ្លូវសហព័ន្ធរុស្ស៊ីនឹងរៀបចំឲ្យក្លាយជាហាងសម្អាងការ កាន់តែធំ រីឯហាងនៅម្ដុំផ្សារទួលគោក គ្រាន់តែជួលដើម្បីស្ដុកអីវ៉ាន់ និងទុកបើកសាឡននិងអ៊ុតសក់ ដើម្បីធ្វើជាអាជីពទី២ប៉ុណ្ណោះ។
យ៉ាងណា ក៏ដោយ មិនមែនថាអ្នកនាង កែវ ពេជ្រពិសី មិនស្តាយទីតាំងហាងចាស់នោះទេ ។ ខណៈអ្នកនាងលើកឡើងយ៉ាងដូច្នេះថា៖«ការបិទចោលទីតាំងចាស់ ពិតជាស្ដាយមែន ព្រោះទីនោះជាប់ផ្លូវធំ ហើយមានគេជិះកាត់ច្រើន ប៉ុន្តែបើខ្ញុំនៅតែបន្តទុកហាងទាំងពីរ គឺពិតជាគ្មានពេលមើលថែទេ ទើបគិតថាត្រូវទុកតែមួយដើម្បីមានពេលពង្រឹងទាំងផ្នែកសម្អាងការ និងសាឡន ឲ្យបានល្អវិញ។ ប៉ុន្តែក៏មិនទាន់កំណត់ថានៅធ្វើនៅតែក្នុងទីតាំងនៅផ្សារទួលគោក រហូតដែរ បើទីតាំងនេះ ធ្វើឲ្យបាត់ភ្ញៀវដែលធ្លាប់គាំទ្រ ក្រោយការបិទចោលហាងធំ ខ្ញុំនឹងរកទីតាំងណាល្អជាងនេះបើកវិញទៀត»៕
