អ្នកកាសែតម្នាក់រងរបួសបែកក្បាលក្នុងការប៉ះទង្គិចគ្នា
សារព័ត៌មាន Cambodia News/
ភ្នំពេញ (១០ តុលា ២០១៦) ៖ កាលពីវេលាម៉ោងប្រហែល១០ ព្រឹក ថ្ងៃទី១០ ខែតុលា នេះ អ្នកកាសែតម្នាក់បានរងរបួសបែកក្បាល ក្នុងការប៉ះទង្គិចគ្នាមួយរវាងក្រុមអ្នកចូលរួមប្រារព្ធទិវាសិទ្ធិ លំនៅដ្ឋានពិភពលោកនិងអាជ្ញាធរខណ្ឌដូនពេញ នៅចំណុចក្បែររបងសាលារចនា តាមបណ្ដោយផ្លូវលេខ១៧៨ ស្ថិតក្នុងសង្កាត់ជ័យជំនះ ខណ្ឌដូនពេញ ។
តាមសេចក្តីរាយការណ៍បានឲ្យដឹងថា បុរសរងគ្រោះឈ្មោះ សារឹម សារុន អាយុ៤៥ឆ្នាំ ជាអ្នកកាសែតឯករាជ្យ ។
កាលពីព្រឹកនេះ មនុស្សប្រហែលជាង៥០០នាក់បានជួបជុំគ្នានៅចំណុចដីក្រហមក្បែរ ស្ថានទូតរុស្ស៊ីដើម្បីប្រារព្ធទិវាលំនៅដ្ឋានពិភពលោក តែខាងអាជ្ញាធរមិនអនុញ្ញាតឲ្យប្រារព្ធនៅទៅនោះឡើយ ក្រោយមកក៏មានការប៉ះទង្គិចគ្នា និងរុញច្រានគ្នាបន្តិចបន្តួច បណ្ដាលឲ្យអ្នកកាសែតឯករាជ្យម្នាក់រងរបួសបែកក្បាល ។
សេចក្តីរាយការណ៍បញ្ជាក់ទៀតថា បន្ទាប់ពីមានការសម្របសម្រួលពីអាជ្ញាធររាជធានីភ្នំពេញ ក្រុមអ្នកប្រារព្ធទិវាសិទ្ធិលំនៅដ្ឋានពិភពលោក ក៏សុខចិត្តដង្ហែបកក្រោយវិញតាមបណ្ដោយផ្លូវស៊ីសុវត្ថិឆ្ពោះទៅ ទីលានប្រជាធិបតេយ្យដើម្បីប្រារព្ធពិធី ៕
